Dore ibyaranze igitaramo Kidumu na Cecile Kayirebwa bakoreye i Kigali

Umuhanzikazi Nyarwanda wakanyujijeho mu ndirimbo zo hambere, Cecile Kayirebwa afatanyije na Kidumu wamamaye cyane mu gihugu cy’u Burundi ndetse no mu karere, bahaye Abanyarwanda Noheli n’Ubunani mu gitaramo cyakorewe i Kigali.

Ku mugoroba wo ku wa Gatanu tariki 22 Ukuboza 2017, i Gikondo ahasanzwe habera imurikagurisha mu ihema rinini niho hari hateraniye iyi mbaga yiganjemo abakuze baje gufatanya n’aba bahanzi kwishima muri ibi bihe byo gusoza umwaka wa 2017.

Iki gitaramo cyari kiyobowe n’umushyushyarugamba MC Lion Imanzi, cyatangiye ahagana saa mbiri n’igice z’umugoroba aho itorero Inganzo ngari ryabanje gususurutsa abitabiriye iki gitaramo mu mbyino gakondo aho wabonaga akanyamuneza ari kose ku maso y’ababarebaga

Itorero Inganzo ngari ryamaze ku rubyiniro igihe kitari gito aho abasore bahamirizaga gitore baca imigara bya kinyarwanda bakuranwa n’inkumi zishayaya mu mbyino gakondo wabonaga binogeye ijisho.

Ahagana saa tatu n’iminota makumyabiri (21h20), nibwo Umuhanzikazi Kayirebwa wari utegerejwe n’imbaga yageze ku rubyiniro aririmba indirimbo ze nyinshi zagiye zikundwa mu bihe byo hambere zirimo iyitwa “Urubamby’ingwe, Twaza Mwajyahe n’izindi nyinshi zagiye zisubiza benshi mu bihe bya kera dore ko abari bajemo abenshi ari abazi izi ndirimbo mu mabyiruka yabo.

Cecile Kayirebwa yaririmbye indirimbo ze nyinshi ndetse wabonaga abari bitabiriye bishimiye cyane kandi bagenda bafatanya nawe kuziririmba ari nako bahanika akaruru bagaragaza ko bamwishimiye ndetse bamutiza imbaraga.

Mu gihe kigera hafi ku isaha irengaho iminota icumi yamaze ku rubyiniro, Cecile Kayirebwa yasoje ubona akishimiwe ku buryo buhambaye kugeza ubwo hafi saa yine na mirongo ine yasezeye akava ku rubyiniro aho yahise yakirwa n’Umuhanzi Hope Irakoze wariririmbye mu gihe abantu bari bategereje Kidumu.

Kidumu wageze ku rubyiniro ku isaha ya saa tunu zuzuye yashimishije abantu gusa bidahambaye cyane nka Kayirebwa dore ko uyu Kidumu yatangiriye ku ndirimbo zisa n’aho zitazwi ziganjemo izo mu ndimi z’amahanga, gusa yaje kugera nyuma akajya avangamo zimwe mu ndirimbo ze zizwi mu Rwanda ndetse inyinshi muri zo abanyarwanda bakunze.

Uko Kidumu yaririmbaga niko bamwe mu bari bitabiriye iki gitaramo bagendaga bikura umwe kuri umwe dore ko bamwe bari batangiye kunanirwa bijyanye n’uko amasaha yari akuze ndetse abandi babasha gukomeza gufatanya n’uyu muhanzi kugeza ahagana saa sita igitaramo kirangiye

13Shares

You may also like...