RDC: Ingamba nshya kuri FARDC ngo isubirane ahigaruriwe na M23
Leta ya DR Congo yongeye imbaraga mu gisirikare kiyifasha kurwanya M23, ishyiraho 20% by’ingengo y’imari y’umwaka utaha kugira ngo isubirane uduce twafashwe n’uyu mutwe.
Ibi byatangajwe na Minisitiri w’Intebe Judith Suminwa ubwo yagezaga ku Nteko Ishinga amategeko umushinga w’ingengo y’imari nshya ingana na miliyari 59 z’amafaranga ya Congo, abarirwa hejuru ya miliyari 20 z’amadolari.
Muri yo, hafi miliyari 12 azafasha kongerera ubushobozi igisirikare, polisi n’izindi nzego z’umutekano. Ni izamuka ry’ingenzi kuko umwaka wabanje igisirikare cyari cyahawe 13% by’ingengo y’imari yose hamwe.
Minisitiri w’Intebe yasobanuye ko guverinoma yiyemeje “kwisubiza ubutaka bwose bwaguye mu maboko y’umwanzi”, mu gihe intambara hagati ya Leta ya Kinshasa n’umutwe AFC/M23 ikomeje. Uyu mutwe uvuga ko ugenzura agace gafite abaturage barenga miliyoni 10 mu Ntara za Kivu y’Epfo na Kivu ya Ruguru, harimo n’imijyi ya Bukavu na Goma.
Nubwo ibi bikorwa bya gisirikare bikomeje mu burasirazuba bw’igihugu, impande zombi zikomeje ibiganiro bibera i Doha bigamije gushaka umuti w’amahoro. Leta ya Congo ivuga ko M23 ishyigikiwe n’u Rwanda, ibirego u Rwanda ruhakana, na rwo rugashinja RDC gufatanya n’umutwe wa FDLR—byombi impande zombi zihakana.
Kongera amafaranga y’igisirikare biri mu mushinga mugari ugera mu 2028, ugamije kunoza imyitozo n’imibereho y’ingabo, kuzifasha kubona ibikoresho bigezweho no kubaka ibikorwa remezo bya gisirikare. Mu gihe ibyo byose bikomeje, ingabo za leta n’abarwanyi b’ubwitange ba Wazalendo baracyarwana n’ingabo za M23 mu bice byinshi by’igihugu.
