Filipine yakatiye maneko w’Ubushinwa igifungo cya burundu
Uwahoze ari Meya muri Filipine (Philippines) ukekwaho ubumaneko ku nyungu z’Ubushinwa, yahamijwe icyaha cy’icuruzwa ry’abantu mu kigo cyakoraga uburiganya bwo kubeshya no kwambura abantu.
Kuri uyu wa Kane tariki ya 20 Ugushyingo 2025, we n’abandi batatu bahamijwe iki cyaha bakatirwa igifungo cya burundu ndetse bategekwa no kwishyura amande ya $33,832 (arenga miliyoni 49Frw).
Urubanza rwa Alice Guo rwamaze igihe kinini ruvugwa muri Filipine nyuma y’aho ubutegetsi bwahishuye kimwe mu bigo binini cy’ubwambuzi muri iki gihugu, giherereye mu mujyi muto wa Bamban. Abantu bagera kuri 800 — Abanyafilipine n’abanyamahanga — bahavuye barokowe nyuma y’isenywa ry’icyo kigo, bamwe mu barokotse bemeza ko bahatirwaga gukora ubwambuzi buzwi nka “pig butchering”.
Guo ufite imyaka 35, yatawe muri yombi umwaka ushize nyuma y’igihe yari amaze yihishayihisha, gusa yahakanye ibyo aregwa byose.
Ntibiramenyekana niba ashobora kujuririra icyo cyemezo.
Haracyari izindi manza eshanu zimureba, zirimo ikirego cy’uko yakoraga ubucuruzi bw’amafaranga binyuranyije n’amategeko.
Mu 2022, Guo yatowe nka Meya wa Bamban, mu majyaruguru y’umurwa mukuru Manila. Abaturage ba ho babwiye BBC ko bamubonaga nk’umuyobozi witangira abaturage kandi ubafitiye impuhwe.
Ariko mu 2024, uwo mujyi mutandukanye wagarutsweho mu itangazamakuru ry’igihugu ubwo hatahurwaga ikigo kinini cy’uburiganya cyari cyihishye inyuma y’ibigo by’imikino y’amahirwe kuri interineti izwi nka “Pogo”.
Pogo zikorwa mu duce tumwe two mu Bushinwa kandi mu busanzwe zitemewe.
Guo yabanje kuvuga ko nta ho ahuriye n’icyo kigo, ariko iperereza rya Sena ryakurikiyeho ryibajije uburyo atabasha kubona ikigo cy’ubwambuzi gikorera kuri hegitari umunani kandi cyari hafi y’ibiro bye.
Nyuma byaje kumenyekana ko icyo kigo — cyari kigizwe n’inyubako 36 — cyubatswe ku butaka bwahoze ari ubwe.
Byanagaragajwe kandi ko hari ibitagenda bihura mu mateka ye: ntiyavukiye muri Filipine nk’uko yari yarabitangaje, ahubwo yavuye mu Bushinwa akiri umwangavu. Abadepite banemeje ko ibikumwe bye bihura n’iby’Umushinwa witwa Guo Hua Ping.
Bidatinze, yakuwe ku mirimo. Mu gihe amakuru mashya ajyanye n’uru rubanza yakomeje gutangazwa, muri Nyakanga 2024 yaraburiwe irengero, bituma hatangira igikorwa mpuzamahanga cyashoboraga kumutahura mu bihugu bine.
Mu kwezi kwa Nzeri k’uwo mwaka, yafatiwe muri Indoneziya ahita asubizwa muri Filipine. Pasiporo ye ya Filipine yahise iteshwa agaciro.
Iri buranisha ryagiye riba mu gihe Filipine n’Ubushinwa bikomeza guhangana ku birwa n’uduce two mu nyanja y’amajyepfo y’Aziya. Nubwo uru rubanza rwakomeje kwigwaho cyane muri Filipine, Ubushinwa bwo nta cyo bwigeze butangaza ku birego bimureba.
