Konti z’imbuga nkoranyambaga ku bana bo munsi y’imyaka 16 zigiye gufungwa

Abana bo muri Australia bafite munsi y’imyaka 16 ni bo ba mbere bagiye guherwaho bahagarikirwa ikoreshwa ry’imbuga nkoranyambaga nka Instagram, Facebook na Threads guhera ku itariki ya 4 Ukuboza 2025, hakurikijwe itegeko rishya rigamije kubarinda ingaruka z’ikoreshwa nabi ry’izo mbuga nkoranyambaga.

Iri tegeko rizatangira gushyirwa mu bikorwa ku wa 10 Ukuboza, rikazagira ingaruka ku mbuga nyinshi zitandukanye, zirimo TikTok, YouTube, X, Reddit n’izindi.

Sosiyeti ya Meta, nyiri izo mbuga, yatangiye gutanga ubutumwa ku bazikoresha bafite hagati y’imyaka 13 na 15 binyuze mu butumwa bugufi, email n’ubutumwa bwo muri porogaramu, ibamenyesha ko konti za bo zizafungwa. Abana basabwe gusuzuma amakuru ya bo y’itumanaho kugira ngo bazamenyeshwe igihe bazemererwa kongera gukoresha konti za bo.

Abana bashaka ko konti za bo zidafungwa bashobora gukoresha uburyo bwo gufata “video selfie” isuzuma imyaka hakoreshejwe isura, cyangwa bagatanga icyangombwa gitangwa na leta kigaragaza neza imyaka ya bo. Ubu buryo bwageragejwe kandi bwemewe n’ikigo Age Check Certification Scheme (ACCS) cyo mu Bwongereza, kandi bwemewe n’inzego za leta ya Australia.

Minisitiri w’Intebe Anthony Albanese yavuze ko icyemezo cyo gufunga imbuga nkoranyambaga ku bana kigamije “gufasha abana kuguma ari abana” no kubarinda ingaruka mbi ziterwa no gukoresha nabi imbuga nkoranyambaga. Icyo cyemezo cyahatiye sosiyete nyinshi, zirimo Meta, kuba zitashyigikiye iri tegeko ariko zemeza ko rizubahirizwa.

Antigone Davis, ushinzwe umutekano muri Meta, yavuze ko bazakora uko bashoboye ngo barinde abana bari munsi y’imyaka 16 gukoresha konti za bo, mbere y’igihe cyateganyijwe cyo guhagarika serivisi.

Mu rwego rwo kwirinda ko abana bakomeza guhura n’abantu bakuru batabazi, urubuga rwa Roblox rwatangaje ko abana bari munsi y’imyaka 16 batazongera kuganira n’abakuru batabazi.

Ubugenzuzi bw’imyaka ku bakoresha Chat buzatangira mu kwezi gutaha kwa 12 muri Australia, New Zealand n’Ubuholandi, bukazagera ku isi hose guhera muri Mutarama 2026.

Abana basabwe kandi kubika cyangwa gukuraho amafoto, amashusho n’ubutumwa bwa bo mbere y’uko konti za bo zifungwa. Itegeko ry’Australia ritekereza gufasha abana kugumana uburenganzira bwa bo bw’ubwana no kubarinda ingaruka zishobora guterwa n’imbuga nkoranyambaga, mu gihe Meta n’izindi sosiyete ziteganya gukoresha uburyo bwo kugenzura imyaka ku isi yose kugira ngo zubahirize amategeko.

Imbuga nkoranyambaga zizagerwaho n’iri hagarikwa ni: Facebook, Instagram, Kick, Reddit, Snapchat, Threads, TikTok, X yahoze yitwa Twitter na YouTube.