CAF yahaye Perezida Ruto igihembo cy’indashyikirwa
Perezida William Ruto yahawe igihembo cy’Umuperezida w’Indashyikirwa cya 2025 n’Impuzamashyirahamwe y’Umupira w’Amaguru muri Afurika (CAF) , gishimira uruhare rukomeye yagize mu guteza imbere no kuzamura urwego rw’umupira w’amaguru muri Kenya no muri Afurika.
Iki gihembo cyatanzwe ku mugoroba wo ku wa Gatatutariki ya 19 Ugushyingo 2025 mu muhango wa ‘CAF Awards 2025’ wabereye i Rabat muri Maroc. Ambasaderi wa Kenya muri Maroc, Jessica Gakinya, ni we wakiriye icyo gihembo ahagarariye Perezida Ruto.
Perezida wa Federasiyo y’umupira w’amaguru muri Kenya (FKF), Hussein Mohammed, yavuze ati: “Ubufasha buhagije guverinoma irimo gushyira mu mikorere y’imikino, cyane cyane umupira w’amaguru, butuma ntashidikanya ko vuba aha abakinyi bacu bazahabwa ibi bihembo bikomeye.”
Perezida wa Tanzaniya Samia Suluhu Hassan ndetse na Perezida wa Uganda Yoweri Museveni na bo bahawe ibihembo, kubera uruhare bagize mu gukomeza inzego z’umupira w’amaguru no gushyigikira ibikorwa by’imikino by’akarere k’Afurika y’iburasirazuba.
Perezida wa CAF, Dr. Patrice Motsepe, yashimye aba bayobozi batatu bo mu burasirazuba bw’Afurika ku bw’umuhati n’ubwitange budasanzwe bagaragaje mu guteza imbere umupira w’amaguru ku mugabane.
Kenya, Tanzaniya na Uganda byafatanyije kwakira amarushanwa ya CHAN 2024, ibikorwa byagaragaje ko hari impinduka mu bikorwa remezo by’amasitade, imigendekere myiza y’ibikorwa n’imikorere iri ku rwego rwo hejuru. Kenya kandi iritegura kwakira irushanwa rya Igikombe cy’Afurika cy’Ibihugu cya 2027 (AFCON 2027).
Mu bihembo byatanzwe muri uwo muhango, ikipe y’abagore ya Nigeria, Super Falcons, ni yo yahawe igihembo cy’Ikipe y’Abagore y’Umwaka, mu gihe Chiamaka Nnadozie yegukanye igihembo cy’Umuzamu w’Abagore w’Umwaka. Achraf Hakimi wo muri Maroc yatowe nk’Umukinnyi w’Abagabo wa CAF w’Umwaka, naho Ghizlane Chebbak atwara igihembo cy’Umukinnyi w’Abagore w’Umwaka.
