Inkuru Nyamukuru

Perezida Kagame yagabiye Umwami wa Qatar

Ku mugoroba wo kuri uyu wa 20 Ugushyingo 2025, Perezida Paul Kagame yagabiye Umwami wa Qatar, Sheikh Tamim bin Hamad Al Thani, zimwe mu nyambo ze ziherereye mu rwuri rwa Kibugabuga ho mu Karere ka Bugesera.

Perezida Kagame yamugabiye izo nyambo nyuma y’uko basura urwo rwuri bakarutambagira, nuko amugabira zimwe mu nyambo atunze nk’impano y’icyubahiro.

Nk’uko bigaragara ku rubuga rwa X rw’Ibiro by’Umukuru w’Igihugu cy’u Rwanda, iyi impano ifite igisobanuro gikomeye mu muco nyarwanda, ikaba ishimangira urukundo, kubahana ndetse n’ubusabane bukomeye buri hagati y’aba bayobozi bombi n’ibihugu bya bo.

Uretse ibyo kandi, mu bisanzwe mu muco nyarwanda, kugabira inyambo ni ugukomeza ubucuti, icyubahiro, amahoro n’ubufatanye. Ni impano ikomeye mu muco nyarwanda, kandi iyo itanzwe ku rwego mpuzamahanga iba ifite igisobanuro cy’icyubahiro gikomeye n’umubano udasanzwe.

Uru ruzinduko rw’Umwami wa Qatar mu Rwanda rugamije kwerekana ubufatanye bukomeye kandi bugamije guteza imbere imikoranire mu nzego nyinshi, no gukomeza gushyigikira amahoro n’iterambere mu karere.

U Rwanda na Qatar bifitanye umubano ukomeye mu by’ubukungu, ibikorwaremezo, ikoranabuhanga n’indege. U Rwanda na Qatar bashyizeho amasezerano y’ishoramari, ubucuruzi, ikoranabuhanga ndetse no mu bijyanye n’indege. Sosiyete y’Indege ya Qatar Airways ifite imigabane mu mushinga w’Ikibuga cy’Indege Mpuzamahanga cya Bugesera, banafatanya mu bijyanye n’ubuhinzi, ikoranabuhanga, umutekano, ubwikorezi na serivisi z’imari.

Perezida Kagame yagabiye Umwami wa Qatar inyambo

Inyambo zo mu rwuri rwa Perezida Kagame ruherereye i Kibugabuga mu Karere ka Bugesera

Tanga Igitekerezo

email ntizatangazwa Ningombwa *