Chameleone n’abandi bahanzi bakomeye mu Burundi bagiye gutaramira i Ngozi
Umuhanzi ukomeye mu Bugande no muri Afurika y’Iburasirazuba, Joseph Mayanja uzwi ku mazina ya Dr Jose Chameleone, agiye kwitabira igitaramo nserukiramuco cy’u Burundi cyiswe “Amahoro Iwacu Festival” kizaba ku wa 29 Ugushyingo 2025, kuri Sitade ya Ngozi.
Nk’uko yabitangaje ku rukuta rwe rwa Instagram, Chameleone yishimiye kwitabira iki gitaramo ndetse abaza abantu niba biteguye gutaramana na we. Yagize ati: “Burundi kuri Sitade ya Ngozi. Muriteguye? Amahoro Iwacu Festival”.
Chameleone azataramana n’abandi bahanzi bakomeye mu Burundi barimo Mugani Desire uzwi ku izina rya Big Fizzo, Youssufu Akbar Niyonkuru uzwi nka Kirikou, Mugisha Jean Junior uzwi nka Double Jay na Girukwishaka Boniface uzwi nka B Face.
Iki gitaramo cyateguwe na Sosoyeti itegura ibitaramo yitwa Malumba Entertainment kigiye kuba ku nshuro ya cyo ya mbere, gifite intego yo kwimakaza amahoro, urukundo, kwihanganirana, iterambere n’ubumwe n’ubwiyunge mu Burundi.
Ibiciro ku bazitabira iki gitaramo ni ibihumbi icumi by’amafaranga y’u Burundi (10,000) ahasanzwe, ibihumbi mirongo itatu (30,000) muri VIP n’ibihumbi mirongo itanu (50,000) muri VVIP. Gusa hari n’imyanya y’ikirenga izishyurwa ibihumbi magana abiri (200,000), izishyurwa ibihumbi magana atanu (500,000) n’izishyurwa miliyoni (1,000,000).

