Amerika na Ukraine bavuze ko hari intambwe nshya mu mugambi w’amahoro.
Leta Zunze Ubumwe z’Amerika na Ukraine batangaje ko bumvikanye ku “mpuza-mwanzuro nshya ivuguruye y’amahoro”, kandi ko bazakomeza imirimo ikomeye yo kunoza uwo mugambi mu minsi iri imbere.
Bavuze ko ibiganiro by’i “Geneve” byatanze umusaruro, kandi Minisitiri w’Ububanyi n’Amahanga w’Amerika Marco Rubio avuga ko habaye “intambwe ikomeye” mu kunoza uyu mugambi usa n’uwakiriwe neza n’Uburusiya, ariko utemerwa n’ubutegetsi bwa Kyiv n’Uburayi bawubonamo kubogamira kuri Moscow.
Rubio yavuze ko hakiri ibyo kunonosora, naho Perezida Volodymyr Zelenskyy avuga ko hari “ibimenyetso ko itsinda riyobowe na Perezida Donald Trump riri kubumva”.
Intego y’ibiganiro kwari ugufungura no kugabanya ibibazo 28 biri muri uwo mugambi w’Amerika. Rubio yavuze ko hari byinshi bamaze kugeraho, ariko amasezerano ya nyuma agomba kwemezwa na perezida w’Amerika n’uwa Ukraine, mbere y’uko bishyikirizwa Uburusiya.
Ibi bije mu gihe Trump yashinjaga Ukraine “kubura icyubahiro” ku mbaraga Amerika ishyira mu kurangiza intambara, akanavuga ko Uburayi bukomeje kugura ibikomoka kuri peteroli by’Uburusiya biragaragara ko ikomeje gutera inkunga intambara.
Amakuru avuga ko Ubwongereza, Ubufaransa n’Ubudage bakoze undi mugambi wa bo, ariko Rubio yarabihakanye.
Ibyasohotse mu mugambi w’Amerika birimo ibintu bitavugwaho rumwe nka:
- Ukraine kureka bimwe mu bice bya Donetsk ifite,
- Kwemera ubutegetsi bw’Uburusiya kuri Donetsk, Luhansk na Crimea,
- Gufatira imipaka ya Kherson na Zaporizhzhia ku mirongo y’urugamba,
- Kugabanya ingabo za Ukraine zikagera ku 600,000 bavuye kuri 880,000,
- Ukraine kutajya muri NATO, ahubwo igahabwa ubwishingizi bw’umutekano,
- Guhagarika ibihano ku Burusiya, no kubusubiza mu itsinda rya G7 rikongera kuba G8.
Trump yari yahaye Ukraine kugeza ku wa Kane kariki ya 27 Ugushyingo 2025 ngo ibe yemeye uwo mugambi, ariko nyuma avuga ko atari “itegeko rya nyuma”.
Rubio yavuze ko afite icyizere cyinshi ko amasezerano azagerwaho vuba.
Habayemo urujijo igihe bamwe mu basenateri b’Amerika bavugaga ko uwo mugambi ari uw’Uburusiya, ariko Rubio arabihakana, avuga ko wateguwe n’Amerika ifatanyije n’ubwunganizi bwa Moscow na Kyiv.
