Nigeria: Abanyeshuri 50 baratorotse nyuma yo gushimutwa ari benshi
Abanyeshuri 50 muri 315 bashimutiwe ku ishuri rya St Mary’s muri leta ya Niger muri Nigeria batorotse abagabo babashimuse mu mpera z’icyumweru gishize.
Ku bufatanye bwa Polisi n’igisirikare, haracyashakisha abarimu 12 n’abana basigaye 265.
Amashuri menshi muri leta ya Niger, Kebbi, Katsina, Yobe na Kwara yahise afungwa nyuma y’aya mashimutwa akomeje kuba menshi. Perezida Bola Tinubu yatangaje ko abapolisi bagiye kongerwaho ibihumbi mirongo itatu (30,000) mu rwego rwo guhangana n’ibikorwa by’abajura bitwaje intwaro.
Mu bindi byabaye, abantu 38 bashimutiwe mu rusengero muri Kwara bararekuwe, abantu babiri bahasiga ubuzima.
Abashinzwe kurokora bavuze ko abo bana 50 batorotse hagati ya ku wa Gatanu tariki ya 22 no ku wa Gatandatu tariki ya 23 Ugushyingo 2025, mu buryo bugaragaza ubutwari. Abashimusi binjiye muri iryo ishuri ahagana saa mbili z’ijoro.
Umubare w’abashimuswe kuri iyi nshuro ni wo mubare munini kuko urenze ab’i Chibok (276) bashimuswe na Boko Haram mu 2014.
Kiliziya n’abaturage barasaba kurekura abana, ndetse Papa Leo XIV yagaragaje “agahinda kenshi”. Imiryango yavugiye kuri BBC iravuga ko ibintu bitangaje, abana bamwe mu bakunze gushimutwa bafite imyaka iri hagati ya 6 na 13.
Guverinoma ya Nigeria ivuga ko ubuyobozi bw’ishuri rya St Mary’s bwirengagije itegeko ryo gufunga amashuri acumbikira abanyeshuri kubera ibimenyetso by’ibitero byari byiyongereye.
Perezida Tinubu yasubitse ingendo mpuzamahanga kugira ngo abanze ahangane n’ikibazo cy’umutekano.
Guverinoma ya Nigeria yahakanye ibirego by’uko ari abakirisitu bahigwa, ivuga ko “abakora ibi bitero by’iterabwoba bica buri wese batavuga rumwe barimo abayisilamu, abakirisitu n’abandi”.
