AmakuruUbumenyi

Ethiopia: Ikirunga cyarutse nyuma y’imyaka ibihumbi gihagarika ingendo z’indege

Ikirunga cyo muri Ethiopia cyarutse bwa mbere mu myaka 12,000 cyari kimaze cyarasinziriye, gisohora umwotsi mwinshi w’umukara mu kirere, bigira ingaruka ku ngendo z’indege ku ntera ndende kugeza mu gihugu cy’Ubuhinde.

Iki kirunga kimaze igihe kitaruka, cyitwa Hayli Gubbi, giherereye mu karere ka Afar mu majyaruguru y’uburasirazuba bwa Ethiopia, cyatangiye kuruka ku Cyumweru, imyotsi ya cyo itwikira ikirere cy’uduce bihana imbibi n’iki kirunga, ndetse bibangamira abahinzi n’aborozi.

Nubwo nta bakomerekejwe n’iruka ry’iki kirunga baratangazwa, byahungabanyije aborozi kuko bishobora kwangiza ubutaka bw’ibiryo by’amatungo, nk’uko umuyobozi w’ako karere, Mohammed Seid, yabitangarije Ibiro Ntaramakuru by’Abanyamerika, The Associated Press.

Abaturage bavuze ko bumvise urusaku rudasanzwe igihe ikirunga cyarukaga. Umuturage Ahmed Abdela yagize ati: “Byari nko guturika kwa bombe isohora imyotsi”.

Iruka ry’iki kirunga ryanagaragaye ku mashusho y’ibyogajuru, aho amashusho ya NASA yerekana umwotsi n’uduce tw’ivu tuzamuka mu kirere tukagera mu Nyanja Itukura.

Ibyuka by’ivu byaturutse muri icyo kirunga, byageze mu bihugu bya Yemen, Oman, Pakistan n’Ubuhinde, nk’uko byatangajwe n’ikigo gishinzwe igenzura ry’iruka ry’ibirunga cya “Toulouse Volcanic Ash Advisory Center”.

Mu gihugu cya Pakistan, Ishami ry’ubumenyi bw’ikirere ryatanze ubutumwa bwo kwitonda nyuma y’uko ivu ryageze mu kirere cya cyo ku mugoroba wo ku wa Mbere.

Mu gihugu cy’Ubuhinde, kompanyi y’indege ya Air India yahagaritse ingendo zimwe na zimwe z’imbere mu gihugu no ku rwego mpuzamahanga kugira ngo isuzume indege zari zanyuze hejuru y’utundi turere nyuma y’iruka ry’ikirunga cya Hayli Gubbi, nk’uko yabitangajwe ku rubuga rwa X.

Umurwa mukuru Delhi, ufite ikibazo gikomeye cy’umwuka wangiritse, ndetse abahatuye bashobora guhura n’ingaruka nyinshi, kuko ivu ari ryinshi mu kirere cya ho, nk’uko byemejwe na India Meteorological Department (IMD). IMD yongeraho ko umwotsi w’ivu uzagenda werekeza mu burasirazuba mu minsi.

Ikirunga cya Hayli Gubbi kiri mu bilometero 800 uvuye ku murwa mukuru Addis Ababa, ni cyo kirunga kiri mu majyepfo y’uruhererekane rw’imisozi rwa Erta Ale, uruhuriza imisozi yo mu karere ka Afar.

Iki kirunga gifite ubutumburuke bwa metero 500 uvuye ku butaka, kikaba uri mu gice cy’ubutaka gikorerwamo ibikorwa ubushakashatsi ku butaka.

Tanga Igitekerezo

email ntizatangazwa Ningombwa *