Burera: Urusengero rwagurishijwe bari kurusengeramo
Urusengero rw’Itorero ryo Kwizera mu Rwanda, CFR, ruherereye mu Kagari ka Gafumba, Umurenge wa Rugarama mu Karere ka Burera, rwagurishijwe bari kurusengeramo.
Amakuru y’igurishwa ry’uru rusengero, asobanurwa neza na Bwana Semivumbi Vianney, wari Umushumba Mukuru w’uru rusengero.
Uyu mushumba yabwiye TV1 ko yashidutse bamubwira ko uru rusengero yayoboraga nta bubasha akirufitemo, ko rwamaze kugurishwa.
Yagize ati: “Nagiye kubona mbona hajemo abandi, ngo baje kuba abashyitsi bivange natwe. Ngira ngo baje kwivanga natwe, mbakire nk’abantu baje mu itorero. Noneho mu gihe maze kubakira bafashe ibyemezo byo kumbwira ko ntakiri umushumba, ko ari bo baruguze”.
Abasengeraga muri uru rusengero bavuga ko batunguwe no kumva ko urusengero basengeragamo rwaragurishijwe. Uyu yagize ati: “Pasiteri yaratubwiye ati: ‘Nanjye nagiye kumva, numva bararugurishije'”.
Undi na we yagize ati: “Twebwe twaje kumenya ko urusengero rwacu rwagurishijwe, nta kundi, twahise tubyakira, tuti: ‘Reka dutegereze ikizavamo’, kuko twabimenye bidutunguye”.
Aba bakirisito bavuga ko uretse inyubako y’urusengero yagurishijwe, hanagurishijwe intebe za rwo, ibyuma bicurangwa mu rusengero hamwe n’ibigega bifata amazi. Uyu ati: “Twarwubatse igihe kirekire kuva hasi, imvura itunyagira, abo bari no kurugurisha nta na kimwe cya kabiri barukozeho. Ibyuma bicurangwa, ikigega, intebe, n’ibyakoreshwaga dutanga amaturo byose barabijyanye nta na kimwe kirimo”.
Uretse uru rusengero rwa Rugarama rwagurishijwe, abakirisito bavuga ko bafite amakuru y’uko mu Karere ka Rubavu hari izindi nsengero nk’izi eshanu zagurishijwe.
Pasiteri Amos Nsabimana, umushumba akaba n’umuvugizi wa CFR mu bice by’Intara y’Amajyaruguru n’Iburengerazuba, yavuze ko urwo rusengero rutari mu zagurishijwe.
Yagize ati: “Hari insengero zagurishijwe bitewe n’uko byemejwe n’inama y’Inteko Rusange y’itorero. Urwo ni rwo rwego rukuru rufata ibyemezo kandi rukabifata hari impamvu zabiteye. Mu zagurishijwe urwa Rugarama ntirurimo”.
Ubuyobozi bw’Akarere ka Burera nta makuru bwatanze kuri iki kibazo cy’igurishwa ry’uru rusengero gusa bamwe mu bakirisito bavuga ko rwafunzwe kubera kutuzuza ibisabwa, ariko ko bari baratangiye imyiteguro yo kuruvugurura nyuma bagatungurwa no kumva ko rwafurishijwe.
