Rwamagana: Umusore yiyahuye, iwabo banga ko abaturanyi bahagera

Umusore wo Mudugudu wa Kavura, Akagari ka Nyarusange, Umurenge wa Muhazi mu Karere ka Rwamagana yimanitse mu mugozi arapfa, bikimenyekana, iwabo banga ko abaturanyi bahagera.

Abaturage bo muri aka gace bavuga ko, nyina w’uyu musore yari yagiye ku isoko, agarutse asanga umuhungu we mu mugozi bikekwa ko yiyahuye.

Umwe muri abo baturage yagize ati: “Umubyeyi yagiye ku isoko, hanyuma uwo muhungu wiyahuye aramuherekeza, amugejeje mu nzira aragaruka. Mu kugaruka ni bwo yakoze ibyo ngibyo, kuko nyina avuye ku isoko yasanze yiyahuye, ni uko arahuruza ari na ko byamenyekanye”.

Undi na we yagize ati: “Yadusanze aho twari turi ahuruza nyiri akabari ngo tujye kureba umwana we ariyahuye. Tugezeyo aratwemerera twinjira mu nzu dusanga umwana ari mu mugozi, urwego rucyegetse umwana ari kunagana. Yari umwana uri mu kigero cy’imyaka iri hagati ya 20 na 23”.

Mu gihe bimenyerewe ko aho abagize ibyago abaturage baza gutabara, muri uru rugo si ko byagenze kuko abaturanyi bagerageje kugera muri urwo rugo, ariko bene rwo bakabyanga ndetse abaturage bavuga ko byabababje.

Uyu yagize ati: “Nari ngiyeyo nk’umuturanyi ariko baranyirukanye. Ubu twese tugiye twiruka. Baratwirukanye pe! Ntabwo bashaka ko dutabara”.

Undi na we yagize ati: “Uriya mumama ntabwo ari kwemera ko hari abantu bajyayo. Na nimugoroba abayobozi bamaze kuhagera, uahise ashyiraho urugi arakinga. N’ubu mu kanya yirukanye abantu ngo nibigendere”.

Ababyeyi b’uyu musore wiyahuye, Karangwa Henry na Mukarusine Chantal, banze kuvugana n’itangazamakuru gusa abaturanyi ba bo bahwihwisaga ko uwo mwana ashobora kua yiyahuye kubera amakimbirane akomeye yari hagati y’ababyeyi be kuko umugabo yari amaze iminsi yarahunze urugo.

Uyu yagize ati: “Bariya bantu nkiri n’umunynerondo, hari igihe twararaga ku rugo rwa bo ngo baticana”.

Umunyamabanga Nshingwabikorwa w’Akagari ka Nyarusange, Tuyisenge Domotien, avuga ko nubwo ababyeyi babanaga mu makimbirane bitakwemezwa ko ari byo byateye uru rupfu.

Yagize ati: “Ni umwana wabanaga n’ababyeyi. Nyina umubyara amusiga ku isoko, aho agarukiye asanga yiyahuye. Tujyayo hamwe n’inzego zibishinzwe kugira ngo zikore ibyo zigomba gukora. Ntitwahamya ko amakimbirane y’ababyeyi ari yo yaba yamuteye kwiyahura, wenda hari ibindi bibazo bye bwite yari yifitiye tutamenye”.

Umurambo wa nyakwigendera wahise ujyanwa mu Bitaro bya rwamagana kugira ngo ukorerwe isuzuma.