Rulindo: Yishe mugenzi we akoresheje majagu amuziza ubwatsi bw’amatungo
Kuri uyu wa Gatatu tariki ya 27 Ugushyingo 2025, ni bwo abaturage bamenye inkuru y’incamugongo y’umugabo witwa Mbonigaba Alphonse wo mu Mudugudu wa Gicumbi, Akagari ka Rurenge, Umurenge wa Mbogo mu Karere ka Rulindo, ukekwaho kwica mugenzi we akoresheje majagu.
Umwe mu baturage wahageze mbere yagize ati: “Nasanze amaze kumwica, mudugudu n’umugore we bavuga bati ‘Aramwishe aramurangiza’. Ninjyayo ndebye aho namusize ahagaze nsanga yamwishe koko. Yamwishe akoresheje majagu”.
Undi muturage na we yasobanuye uburyo byagenze ati: “Bambwiye ko yamukubise majagu bwa mbere agwa hasi, arangije amukubita igifunga cya yo, hanyuma amujombesha ya majagu nk’uri guhinga. Ibyo yakoze birenze iyicarubozo kuko nyuma yo kumwica yanashinyaguriye umurambo”.
Straton Nzabonimana, umugabo w’imyaka 32 ni we wishwe na mugenzi we hakoreshejwe majagu.
Umugore wa nyakwigendera yabwiye TV1 ko impamvu y’ikibazo cya bo yari ishingiye ku bwatsi bw’amatungo.
Yagize ati: “Uw’iwanjye akomeza kwahira aramubwira ati: ‘Alphonse ntituzapfe ubusa, uru rubingo si urwawe, kuki urwiyitirira?’ Ntiyashatse no kumva inama z’abayobozi b’umudugudu, ahubwo arabatuka. Ntitwamenye icyo yari agamije, ahita afata rwa rubingo arujyana iwe. Hashize akanya agaruka afite majagu. Uw’iwanjye yari akiri kwahira, yubuye umutwe gato aba aramwashije, agwa hasi. Arongera arayimukubita, aranamujyonjyora. Twari abadamu batatu tubirebera, tugiye gufata amabuye ahita atwirukankana afite majagu, duhita dutabaza duvuza induru”.
Umunyamabanga Nshingwabikorwa w’Umurenge wa Mbogo, Nyirumuringa Pierre Damien, na we yemeje iby’uru rupfu. Ati: “Yabanje kwirukankana abayobozi b’umudugudu n’abaturage bari aho. Yamubajije ati: ‘Kuki nkubuza kwahira ubwatsi bw’umuryango wanjye, ukanga ukabwahira?’ Undi ati: ‘Ese ko naburagijwe nabuhawe na muzehe, ndetse nanakodeshwa, ikibazo ni ikihe’? Nuko amukubita majagu ya mbere, iya kabiri ahita apfa. Bahise bamujyana ku Bitaro bya Ruytongo”
Mbonigaba Alphonse ukekwaho icyaha yahise atoroka nyuma yo kwica mugenzi we. Urwego rw’Igihugu rw’Ubugenzacyaha, RIB, rwatangiye iperereza kugira ngo hamenyekane ukuri ku byabaye.
