Ishyamba si ryeru hagati ya Trump na Ramaphosa
Perezida wa Leta Zunze Ubumwe z’Amerika, Donald Trump, yatangaje ko Cyril Ramaphosa, Perezida wa Afurika y’Epfo, atazatumirwa mu nama ya G20 iteganyijwe kubera muri Florida mu mwaka utaha.
Ramaphosa yavuze ko iki cyemezo “giteye agahinda.”
Trump, abinyujije ku mbuga nkoranyambaga, yavuze ko Afurika y’Epfo yanze gushyigikira ubuyobozi bwa G20, intumwa ya Ambasade ya Amerika mu nama ya G20 yabereye i Johannesburg mu cyumweru gishize.
Yagize ati: “Kubera ibyo, ku mabwiriza yanjye, Afurika y’Epfo ntizatumirwa mu nama ya G20 yo mu 2026 izabera i Miami muri Florida.”
Nubwo ibihugu bya G20 bidasabwa ubutumire kugira ngo byitabire, bishobora kwangirwa binyuze mu gukumirwa kwa viza.
Umuvugizi wa Perezida Ramaphosa, Vincent Magwenya, yavuze ko ku rwego rwo hejuru byemejwe ko umubano hagati y’Afurika y’Epfo na Amerika udashobora gusubira uko wari umeze, nubwo habayeho gukosora ibibazo inshuro nyinshi.
Ati: “Niba viza zanze gutangwa, nta cyo twabihinduraho. Ubuzima burakomeza, kandi natwe tugomba gushakisha andi mahirwe atari G20 izabera muri Amerika.”
Yongeyeho ko Afurika y’Epfo iri gukomeza gukorana n’abandi banyamuryango ba G20 kugira ngo ibiganiro byatangiye i Johannesburg bikomeze.
Trump ntiyitabiriye inama iheruka ya G20, ayirengagije kubera ikirego cyavugaga ko abazungu bake ari bo bahohoterwa cyane muri Afurika y’Epfo, bakamburwa n’amasambu. Ramaphosa yabigarutseho, avuga ko Amerika yari yitezwe mu nama ariko ikaba yarahisemo kuyisuzugura kandi hari n’ibigo n’imiryango yo muri Amerika yari yitabiriye.
Perezida Ramaphosa yasobanuriye itangazamakuru ko intumwa z’Amerika zitari zihari, bityo ibikoresho by’ubuyobozi bwa G20 bikaba byarashyikirijwe umukozi w’Ambasade y’Amerika ku cyicaro cya Minisiteri y’Ububanyi n’Amahanga ya Afurika y’Epfo. Trump yavuze ko uwo muhango warimo kutubaha Amerika ndetse ari na cyo cyatumye arushaho kurakara.
Trump yigeze kubwira itangazamakuru ko muri Afurika y’Epfo habera “jenoside ikorerwa abazungu”, kandi ku wa Gatatu yongeye kubivuga, ashinja guverinoma y’Afurika y’Epfo kwica abazungu no kubambura amasambu ku gahato. Guverinoma yo yakomeje guhakana ibyo birego, ivuga ko ari ibinyoma bitagira gihamya.
Ramaphosa yavuze ko bibabaje kubona Trump akomeje gushingira ku makuru y’ibinyoma mu gufatira igihugu cye ibihano, mu gihe hari habayeho imbaraga nyinshi zo kongera kubaka umubano.
Mu butumwa Trump yashyize ku rubuga rwe rwa Truth Social, yavuze ko Afurika y’Epfo itagaragaza imyitwarire ikwiye nk’umunyamuryango wa G20, maze atangaza ko ahagaritse inkunga yose Amerika yatangaga kuri Afurika y’Epfo.
Afurika y’Epfo yahise isaba abagize G20 bose kwirinda kugoreka intego z’inama no kurengera inshingano zingana z’ibihugu binyamuryango.
Inama ya G20 yaberaga bwa mbere muri Afurika yasojwe n’itangazo rihamya ubufatanye mpuzamahanga mu guhangana n’imihindagurikire y’ikirere no kugabanya ubusumbane. Amerika yo yanze gushyigikira uwo mwanzuro, ivuga ko Afurika y’Epfo itashoboye kuzuza inshingano za yo nk’umuyobozi w’inama.
