Gicumbi: Yatemye umusore wamusambanyirizaga umugore n’abakobwa be

Umugabo witwa Niyonzima Alexis, wo mu Mudugudu wa Kavumu, Akagari ka Nyarubuye, Umurenge wa Mutete w’Akarere ka Gicumbi akurikiranyweho gutema mu buryo bukomeye umusore witwa Nshimiyimana Olivier amushinja kumusambanyiriza umugore n’abakobwa be.

Niyonzima yatemye uyu musore uri mu kigero cy’imyaka 23, mu ijoro ryo ku wa Kabiri w’iki cyumweru turi gusoza.

Nshimiyimana ngo yigeze kuba muri uyu muryango wa Niyonzima awuvura mu buryo bwa gakondo kuko ngo na se ari byo yakoraga, birangira ahagumye ahinduka nk’umwana mu rugo. Gusa nyir’urugo yakunze kumushinja kumusenyera avuga ko aryamana n’umugore n’abakobwa be ari na cyo gituma abaturanyi be bakeka ko ari cyo gishobora kuba cyaramuteye kwihanira.

Umwe muri bo yagize ati: “Niba yari yaje aje kuvura urugo ahubwo akaza kurusenya, birumvikana ko icyamuzanye atari cyo yakoze. Yitwaye nabi kuko yagiye gupfubura umwana na nyina”.

Uwamariya Marie Rose, umugore w’uyu mugabo hamwe n’umukobwa we, Yvette kamikazi bavuga ko batigeze bagiraga umubano wihariye na Nshimiyimana wageza ku kuryamana ahubwo ko bamufataga nk’umwana wanabafashaga mu bucuruzi bukunguka.

Uwamariya ati: “Umwana twaramukunze. Mu rugo, abana banjye bakunda uwo mwana. Ubu ndi umugore wo kuryamana n’umwana w’imyaka 23? Ibyo ndabihakanye”.

Kamikazi na we yagize ati: “Twamufataga nk’umwana wacu, twamwisanzuragaho bisanzwe”.

Umunyamabanga Nshingwabikorwa w’Umurenge wa Mutete, Mwanafunzi Deogratias, avuga ko ubusanzwe uyu muryango wabanaga mu buryo bw’amakimbirane gusa ibindi abiharira inzego z’iperereza nk’uko yabitangarije TV1.

Yagize ati: “Ikibazo cyabaye gishingiye ku makimbirane y’umuryango ndetse n’uwo musore akaba arimo. Ibindi bijyanye n’icyo kibazo, birumvikana ko hakozwe icyaha cy’urugomo, biri mu rwego rw’iperereza nk’urwego rubishinzwe”.

Nshimiyimana Alexis arembeye kwa muganga mu gihe Niyonzima yahise yishyikiriza Polisi akimara gukora icyo cyaha.