Hong Kong: Batangiye iminsi itatu yo kunamira abarenga 100 bazize inkongi
Kuri uyu wa Gatandatu tariki ya 29 Ugushyingo 2025, muri Hong Kong batangiye icyunamo cy’iminsi itatu mu kwibuka abantu benshi bazize inkongi iheruka kwibasira uyu mujyi wo mu Bushinwa.
Abayobozi b’umujyi bafashe akanya gato ko kwibuka abishwe n’inkongi yahitanye abantu benshi kurusha izindi nkongi mu myaka 80 ishize. Inkongi yabaye ku wa Gatatu w’iki cyumweru yibasiye inyubako ndende za Wang Fuk Court, abantu 128 ni bo bamaze kumenyekana ko bapfuye, abandi benshi bakaba barabuze.
Abantu umunani bamaze gufatwa bakekwaho ruswa mu kuvugurura izo nyubako, mu gihe abandi batatu bafashwe bakekwaho ibyaha byo kwica abantu batabishaka. Ibendera rya Hong Kong n’Ubushinwa yururukijwe kugeza muri kimwe cya kabiri, abayobozi bahagarara akanya gato mu kwifatanya n’abaturage kwibuka ababo baguye muri iyo nkongi. Leta yashyizeho n’ahantu ho kwibukira hirya no hino mu mujyi, aho abaturage bashobora kwibuka no kwandika amagambo y’ihumure.
Inkongi yibasiye inyubako zirindwi mu munani za Wang Fuk Court, abasirikare bashinwe kuzimya inkongi barenga 2,000 bakaba barakomeje imirimo mu gihe cy’iminsi ibiri. Impamvu y’iyi nkongi iracyari gukorwaho iperereza, ariko bavuze ko ibintu byakoreshejwe ku nzugi, hanze y’amadirishya n’imigozi byafashije gukwirakwira kw’inkongi.
Ubushinjacyaha bwatangaje ko iperereza rizakomeza mu byumweru biri imbere, polisi ikaba imaze gukusanya ibimenyetso. Hari umujinya ukomeye mu baturage kubera impuruza z’umuriro zasenyutse n’ubwitwararike buke bw’isosiyete yavugururaga izo nzu. Komite yigenga yo kurwanya ruswa (ICAC) yavuze ko abafashwe barimo abayobozi b’isosiyete y’ubwubatsi n’abubakaga ibikwa byo guhagararaho bubaka.
Chris Sun, Umunyamabanga ushinzwe Umurimo n’Imibereho myiza, yavuze ko magenzura 16 yakozwe ku bikorwa by’amavugurura kuva muri Nyakanga 2024. Wang Fuk Court yubatswe mu 1983, ifite inzu 1,984 zibamo abantu 4,600 nk’uko ubushakashatsi bwa leta bwa 2021 bubigaragaza.
Hong Kong batangiye icyunamo cy’iminsi itatu bazirikana abazize inkongi
