Ethiopia yugarijwe n’icyorezo cya “Marburg”
Ethiopia yemeje ikwirakwira ry’icyorezo cya Marburg mu majyepfo y’igihugu, nk’uko byatangajwe n’Ikigo Nyafurika gishinzwe gukurikirana no guhangana n’indwara z’ibyorezo (Africa CDC).
Marburg virus ni kimwe mu byorezo byica abantu cyane. Nk’uko Ebola ibigenza, itera kuva amaraso menshi, umuriro, kuruka n’impiswi, kandi abayanduyte bajya mu kato mu gihe cy’iminsi 21. Ikwirakwizwa no gukoranaho n’amatembabuzi kandi igira igipimo cy’abapfa kiri hagati ya 25% na 80%.
Umuyobozi w’Ishami ry’Umuryango w’Abibumbye Ryita ku Buzima (WHO), Tedros Adhanom Ghebreyesus wo muri Ethiopia, ejo hashize yemeje ko byibura abantu 9 bamaze kugaragaza ibimenyetso by’iyi virusi mu majyepfo ya Ethiopia, iminsi ibiri nyuma y’uko CDC ibitangaje.
Kuri uyu wa Gatandatu tariki ya 29 Ugushyingo 2025, CDC yatangaje kuwa Gatandatu ko ikigo gisuzuma indwara cyo muri Ethiopia yemeje iyi virusi. Hari gukorwa iperereza ryimbitse n’isesengura, kandi ubwoko bwa virusi bwagaragajwe busanzwe bwagaragaye mu bindi bihugu byo muri Afurika y’Iburasirazuba. Inzego z’ubuzima za Ethiopia ziri maso mu kugenzura no gukumira ikwirakwira ry’icyorezo mu gace ka Jinka. CDC irakorana na Ethiopia kugira ngo hashakwe igisubizo kandi igabanye ibyago byo gukwirakwira kwa virusi mu bindi bice by’Afurika y’Iburasirazuba.
Mu kwezi kwa Mutarama 2025, icyorezo cya Marburg cyahitanye abantu 10 muri Tanzania, kirangira mu kwezi kwa gatatu. Mu Kuboza 2024, u Rwanda rwavuze ko iki cyorezo cyakumiriwe, nyuma yo guhitana abantu 15.
Nta rukingo cyangwa umuti wa Marburg, ariko gusubiza amazi mu mubiri n’imiti y’ibimenyetso bifasha abantu kugira amahirwe yo kurokoka. Mu mwaka ushize, u Rwanda rwagerageje urukingo rw’iki cyorezo ruvuye mu Kigo gikora inkingo cya Sabin Vaccine Institute, muri Amerika.
