Ikimenyetso cya mbere kikwereka ko uri kureba videwo yakozwe n’ubwenge buhangano (AI)

Imbuga nkoranyambaga zanyu zirimo kuzura amashusho mabi yakozwe n’ubwenge bw’ubukorano (AI – Artificial Intelligence). Hari ikimenyetso kimwe cyabafasha kuyamenya: ubuziranenge buke bw’izo videwo, zigasa n’aho zafashwe na kamera itari nziza.

Nta kindi. Muzabihomberamo. Birashoboka cyane ko mwamaze kubigwamo. Mu mezi atandatu ashize, ibikoresho by’ubwenge bw’ubukorano bikora amavidewo byateye imbere cyane ku buryo uko twiringira kamera bigiye guhinduka. Ibyo bishobora kubaviramo: guhora mwibeshya, kenshi cyane, kugeza aho mushobora kurambirwa, mugatangira gushidikanya ku kuri kw’ibintu byose mubona. Murakaza neza mu isi y’ejo hazaza.

Ariko kuri ubu, haracyari utumenyetso duke twagombye kwitaho. Kamwe muri two ni ingenzi cyane. Niba mubona amashusho atagaragara neza, adasobanutse kandi atameze neza, mugire amakenga: ushobora kuba ureba videwo yakozwe n’ubwenge bw’ubukorano.

Hany Farid aravuga ati: “Icyo ni kimwe mu bintu bya mbere tureba.”

Farid ni umwarimu mu by’ubuhanga muri Kaminuza ya California i Berkeley. Ni umwe mu batangije ubushakashatsi ku gusesengura amakuru y’ikoranabuhanga, kandi ni na we washinze ikigo gikora ku kumenya amavidewo n’amafoto by’ubukorano cyitwa GetReal Security.

Ikibabaje ni uko ibikoresho by’ubwenge bw’ubukorano bikora amavidewo bizakomeza gutera imbere, bityo iyi nama ikazatakaza agaciro. Ibyo bishobora kuba mu mezi make cyangwa mu myaka mike. Biragoye kubimenya. Ariko nufata umwanya wo gusobanukirwa neza igitekerezo kiri inyuma y’iyi nama, ishobora kugufasha kwirinda kugwa mu mutego w’amwe mu mavideo ya AI ataranozwa neza, mu gihe urimo gushaka kumenya ukuri.

Reka tubivuge neza: iki si cyo kimenyetso cyonyine cy’ukuri. Amavidewo yakozwe n’ubwenge bw’ubukorano si ko yose aba mabi. Ibikoresho bya AI byateye imbere bishobora gukora amavidewo meza cyane, asukuye kandi asa neza.

Na none kandi, videwo itagaragara neza ntivuze byanze bikunze ko yakozwe n’ubwenge bw’ubukorano.

Matthew Stamm, umwarimu akaba n’umuyobozi w’Ikigo cy’Ubushakashatsi ku Mutekano w’Amakuru n’Amavidewo muri Kaminuza ya Drexel muri Leta Zunze Ubumwe z’Amerika, avuga ati: “Iyo ubonye ikintu kibi, ntibivuze ko ari ikinyoma. Kandi ntibivuze ko hari umugambi mubi uri gutegurwa.”

Mu by’ukuri, muri iyi minsi, amavidewo ya AI atagaragara neza ni yo ashobora kubeshya abantu cyane kurusha ayandi. Ibyo ni ikimenyetso gituma ugomba kubanza kwitegereza neza, ugasuzuma mu buryo bwimbitse ibyo ureba.

Hari uburyo bwo kugabanya videwo hakurwamo ibisobanuro by’uko bimeze, bigatuma amashusho atagaragara neza n’imirongo ikaba itagaragara neza.

Farid avuga ko amavidewo asa nabi ashobora kwizerwa kurusha ayandi, ku buryo abayakora babigira ku bushake. Asobanura ati: “Niba nshaka kuyobya umuntu, nakora videwo y’ikinyoma, hanyuma nkagabanya ubuziranenge bwa yo kugira ngo igume igaragara ariko hatagaragara neza ibisobanuro byose. Hanyuma nkayongera nkayigabanyiriza uburemere, ngahisha utunenge twose twashoboraga kugaragara.” Yongeraho ati: “Uwo ni umugenzo ukoreshwa cyane”.

Ikibazo ni uko, mu gihe urimo usoma iyi nyandiko, ibigo bikomeye by’ikoranabuhanga biri gushora miliyari z’amadolari mu gutuma ubwenge bw’ubukorano burushaho kumera nk’ukuri. Stamm yavuze ati: “Mfite inkuru mbi: niba ibi bimenyetso bigaragara bikiriho uyu munsi, vuba bizabura”.

Akomeza agira ati: “Ntekereza ko mu myaka ibiri iri imbere, uturango tw’amakosa tutazaba tukigaragara mu mavidewo. No muri iki gihe, ibigaragaza ko videwo yakozwe na AI bigenda bigabanuka cyane. Ntituzongera kwizera amaso yacu gusa”.

Ibyo ariko ntibisobanura ko ukuri kwazimiye burundu. Iyo abashakashatsi nka Farid na Stamm basesengura ikintu, bakoresha ubuhanga buhanitse cyane. Stamm asobanura ati: “Iyo videwo ikozwe cyangwa ihinduwe, hasigara ibimenyetso by’imibare bidashobora kubonwa n’amaso gusa”.

Akomeza ati: “Turi kubona uburyo bushya bwo kumenya no kugaragaza ibyo bimenyetso.”
Rimwe na rimwe, uko videwo igaragara nabi bishobora gutuma umuntu ayishidikanyaho, ariko ibyo byonyine ntibihagije ngo bibe ikimenyetso kidashidikanywaho.

Amashyirahamwe y’ikoranabuhanga na yo ari gushyiraho amategeko n’ingamba nshya zo kugenzura no kwemeza ukuri kw’amakuru yo kuri interineti. Mu buryo bufatika, kamera zizashobora gushyira amakuru y’inyongera muri dosiye y’ifoto cyangwa ya videwo, agaragaza aho n’igihe byafatiwe. Ku rundi ruhande, ibikoresho bya AI na byo bishobora gushyiramo amakuru agaragaza ko ari iby’ubukoranyambaga. Stamm n’abandi bahanga bemeza ko izo ngamba zishobora gufasha cyane.

Umuti nyawo, nk’uko Mike Caulfield, inzobere mu gusoma no gusesengura amakuru yo kuri internet, abivuga, uri mu guhindura uko tubona amakuru ari kuri murandasi. Avuga ko gushaka gusa ibimenyetso bya IA atari igisubizo kirambye, kuko bigenda bihinduka uko ikoranabuhanga ritera imbere. Ahubwo, dukwiye kureka igitekerezo cy’uko videwo cyangwa ifoto ishobora kwihagararaho idafite inkomoko n’amavu n’amavuko yayo.

Avuga ati: “Mu gihe kirekire, videwo izamera nk’inyandiko: aho inkomoko ya yo izaba ifite agaciro kurusha uko igaragara inyuma. Byaba byiza dutangiye kwitegura ibyo”.

Ntitujya twemera inyandiko ngo tuyifate nk’ukuri gusa kubera ko yanditswe. Iyo dushidikanya, tugenzura inkomoko. Kera, amavideo n’amashusho byizerwaga cyane kuko byari bigoye kubihindura. Ubu siko bikimeze. Icy’ingenzi ni ukumenya inkomoko y’ikintu, uwagikoze, aho cyanyuze n’uko cyakwirakwijwe, no kumenya niba cyaturutse ahantu hizewe.

Stamm asoza agira ati: “Ntekereza ko iyi ari imwe mu mbogamizi zikomeye kurusha izindi zose mu mutekano w’amakuru mu kinjana cya 21″.

Akomeza ati: “Iki kibazo kiracyari gishya, kandi umubare w’abantu bakigize umwuga uracyari muto, ariko uri kwiyongera cyane. Tuzakenera ibisubizo bitandukanye bihujwe: uburezi, amategeko agenga ubwenge bw’ubukorano, n’imikoreshereze iboneye y’ikoranabuhanga. Ndabyizeye”.