Amerika mu rugamba rwo kureshya ibihugu bitatu by’Afurika bibanye neza n’Uburusiya
Leta Zunze Ubumwe z’Amerika zatangaje impinduka ikomeye muri politiki ya zo ku bihugu bitatu byo muri Afurika y’Iburengerazuba—Mali, Burkina Faso na Niger—biyoborwa n’ingabo, bihanganye n’imitwe y’aba-jihadiste, kandi byari byararetse gukorana n’Ubufaransa bikiyegereza Uburusiya.
Iyi mpinduka igaragarira mu rugendo rw’umuyobozi w’Amerika ushinzwe Afurika, Nick Checker, i Bamako, aho Amerika igaragaza ko yubaha ubwigenge bwa Mali kandi ishaka gutangiza umubano mushya n’ibi bihugu uko ari bitatu, yemera ko habaye amakosa ya politiki mu bihe byashize.
Mu gihe cy’ubutegetsi bwa Joe Biden, Amerika yari yarahagaritse ubufatanye bwa gisirikare kubera ihirikwa ry’abaperezida batowe n’abaturage. Ariko kuva Donald Trump agaruka ku butegetsi, Amerika yatangiye gushyira imbere cyane umutekano no kurwanya iterabwoba, aho gushyira ingufu kuri demokarasi n’imiyoborere myiza.
Impamvu nyamukuru zituma Amerika ihindura iyi politiki zirimo impungenge z’umutekano muri Sahel, agace gafite igipimo cyo hejuru cyane cy’impfu ziterwa n’iterabwoba ku isi, n’ubwoba ko imitwe y’aba-jihadiste yahakura ibirindiro bikomeye byabangamira umutekano mpuzamahanga.
Hari kandi inyungu zishingiye ku mabuye y’agaciro, kuko aka karere gafite zahabu, lithium na uranium nyinshi, kandi Amerika idashaka ko Uburusiya bwonyine bugira ijambo rikomeye mu mutekano no mu bukungu bw’ibi bihugu.
Nubwo Amerika itifuza gusubiza ingabo za yo ku butaka bwa Sahel, yemeye gukomeza gutanga amakuru y’ubutasi n’ubundi bufasha bwa gisirikare. Ibi bigamije gufasha guhangana n’imitwe y’aba-jihadiste, cyane cyane mu gace ka Mali, Burkina Faso na Niger bihuriramo nk’uko BBC ibitangaza.
Iyi politiki nshya y’Amerika igaragaza ko ubu ishyira imbere inyungu z’umutekano n’iz’ubukungu, aho gushyira igitutu ku miyoborere ishingiye kuri demokarasi, mu gihe ikibazo cy’umutekano muri Sahel gikomeje gukaza umurego.
