Burundi: Umupolisi yakatiwe gufungwa amezi 6000
I Burundi hakomeje kuvugwa inkuru y’igifungo cy’ amezi 6,000 (imyaka 500) cyahawe umupolisi witwa Osias Irankunda mu gihe yaba ananiwe kwishyura indishyi z’akababaro za FBU miliyoni 100 yaciwe n’Urukiko rw’i Mwaro mu Burundi.
Uyu mupolisi yahawe iki gihano nyuma yo guhamwa n’icyaha cyo kugira uruhare mu rupfu rw’uwitwa Nestor Nininahazwe wari uzwi ku izina rya Gasazi.Uyu Gasazi yari asanzwe akora akazi ko gutwara abantu n’ibintu kuri moto (umumotari) , yishwe mu ijoro rya Pasika ku wa 4 Mata 2026.
Uyu mupolisi Irankunda yari asanzwe acunga umutekano kuri Paruwasi ya Kibungere iri muri Komine Nyabihanga, Zone Kibungere.Bivugwa ko uyu mupolisi yasanze nyakwigendera ku kabari aho yari ari kunywera akamusaba kumusomya ku icupa ariko undi aramwima, hanyuma bikarangira amurashe.
Nyuma yo kumwica, yahise afatwa ajyanwa gufungirwa kuri sitasiyo ya polisi ya Gitega.
Umuvugizi wa Polisi y’i Burundi Pierre Nkurikiye yagaragaje ko abapolisi 6 bashinjwa kwiba umuturage miliyoni 15, nyuma yo kumusanga iwe mu rugo bakamushimuta, mbere yo kumutegeka kubaha miliyoni 20; yaba atazibonye bakazamushyikiriza urwego rw’iperereza, bamubwira ko aho ashobora no kuhicirwa.Uwo mutarage witwa Nyandwi Gerard wari washimuswe yari atuye i Kamenge.
Bivugwa ko yahamagaye inshuti n’abavandimwe bamufasha kubona miliyoni 15, ari zo yahaye abo bapolisi, baramurekura.Nyuma amakuru yabo yaramenyekanye barafatwa uko ari batanu, umwe aratoroka.
Pierre Nkurikiye uvugira Polisi y’u Burundi, yavuze ko bariya bapolisi bakoze ibyaha byakozwe ku giti cyabo kuko nta rwego rwabatumye, ashimangira ko bagomba kubihanirwa n’amategeko bakaryozwa ibyo bakoze.
