Ubufaransa bwamaganye iyangizwa ry’urwibutso rwa Jenoside yakorewe Abatutsi i Rouen
Ambasade y’u Bufaransa mu Rwanda yamaganye bikomeye igikorwa cyo kwangiza ikimenyetso cy’urwibutso rwa Jenoside yakorewe Abatutsi giherereye mu mujyi wa Rouen, ishimangira ko ari igikorwa kidakwiye cyibasira agaciro k’urwibutso n’icyubahiro cy’abazize Jenoside.
Mu butumwa yashyize ku rubuga X, iyi ambasade yavuze ko Ubufaransa bwifatanyije byimazeyo n’abarokotse Jenoside yakorewe Abatutsi n’imiryango ya bo, inibutsa ko inshingano yo kwibuka igomba kujyana n’iyo gutanga ubutabera ku bakoze ibyaha.
Ku rundi ruhande, umuryango IBUKA France watangaje ko iki gikorwa gifite uburemere bukomeye, kuko kwangiza inzibutso za Jenoside ari ugusuzugura abazize Jenoside, abarokotse ndetse n’indangagaciro z’ubumuntu.
Uyu muryango wasabye ubuyobozi bw’Ubufaransa gukora iperereza ryimbitse, hagamijwe kumenya ababigizemo uruhare no kubageza imbere y’ubutabera. Wongeyeho ko inzibutso zifite uruhare rukomeye mu kubungabunga amateka, kugaragaza ukuri no kukugeza ku bisekuru bizaza.
Uru rwibutso rwo muri Rouen ruracyari rushya, kuko rwashyizweho ku wa 13 Mata 2024, mu gihe u Rwanda rwari mu bikorwa byo kwibuka ku nshuro ya 30 Jenoside yakorewe Abatutsi mu 1994.
