Abakomando ba RDF basoje imyitozo yihariye bari bamazemo ibyumweru 22 (Amafoto)
Abasirikare n’abofisiye bo mu Ngabo z’u Rwanda (RDF) mu Mutwe w’Ingabo Zidasanzwe (Special Operations Force), basoje amahugurwa y’ibanze yo guhangana n’iterabwoba.
Ni amahugurwa yamaze ibyumweru 22, yabereye mu Ishuri Rikuru rya Gisirikare rya Gako, akaba yasojwe kuri uyu wa Gatanu, tariki 06 Werurwe, 2026 nk’uko Igisirikare cy’u Rwanda cyabitangaje.
Umuhango wo gusoza aya mahugurwa wayobowe n’Umugaba w’Ingabo zirwanira ku butaka, Maj Gen Vincent Nyakarundi, ahagarariye Umugaba Mukuru w’Ingabo z’u Rwanda, witabiriwe kandi na ba ofisiye bakuru ba RDF.
Amahugurwa bariya basirikare basoje, yari agamije kongerera ubushobozi abasirikare bo mu mutwe w’Ingabo zidasanzwe, binyuze mu kubaha ubumenyi buhanitse mu bya gisirikare bubafasha guhangana n’ibibazo by’umutekano bigenda bigaragara muri iki gihe.
Maj. Gen. Nyakarundi yashimiye abatoza ku bwitange n’ubunyamwuga bagaragaje mu gutanga amahugurwa afite ireme, akomeza gushimangira ubushobozi bw’abasirikare ba RDF.
Maj. Gen. Nyakarundi yanashimiye abarangije amahugurwa ku myitwarire myiza n’umuhate bagaragaje, anabifuriza kuzakoresha neza ubumenyi bungutse mu butumwa bazahabwa mu gihe kiri imbere.
