Afurika n’Uburayi bafite ubushobozi bwo guhindura isi-Antonio Guterres
Umunyamabanga Mukuru w’Umuryango w’Abibumbye (UN), Antonio Guterres, yavuze ko Umuryango w’Afurika Yunze Ubumwe (AU) n’Umuryango w’Ubumwe bw’Uburayi (EU) bifite uruhare rukomeye mu guhindura isi iri mu bihe by’ihindagurika rikomeye.
Ibi yabivuze ubwo yagezaga ijambo ku bitabiriye Inama ya AU–EU yabereye i Luanda muri Angola ku wa 24 Ugushyingo 2025, mu gihe iki gihugu cyizihizaga imyaka 50 y’ubwigenge.
Guterres yavuze ko isi ihanganye n’ikoranabuhanga rihinduka buri munsi, ingaruka z’ihindagurika ry’ibihe n’ubusumbane bukomeje kwiyongera. Yibukije iyo ibihugu bihuje imbaraga bishobora guteza imvururu mu gihe hatabayeho imiyoborere myiza n’ubufatanye mpuzamahanga.
Yashimye ubufatanye bwa AU na EU, avuga ko bafite ubushobozi bwo kuba urufunguzo rw’isi nshya irangwa n’uburinganire n’ubutabera, kandi bugomba gukoreshwa mu gukosora akarengane ka kera no guha Afurika ijwi riyihesha agaciro mu byemezo mpuzamahanga.
Guterres yavuze ko uburyo bw’imari ku isi bukomeje gukorera ibihugu bikize, asaba ko bukosorwa kugira ngo byungure buri gihugu.
Yakomeje agira ati: “Icyerekezo cy’inama mpuzamahanga yabereye i Seville, icy’Umuryango w’Afurika Yunze Ubumwe cya 2063 na n’icy’Umuryango w’Abibumbye cya 2030, byerekana inzira yo kurwanya ubukene no kugabanya imizi y’ubuhunzi n’ubwimukira”.
Yavuze ko Afurika ifite umutungo kamere, cyane cyane izuba, umuyaga n’amabuye y’agaciro akenewe mu ngufu zidafite ingaruka, kandi asaba ko habaho guteza imbere inganda zongerera agaciro ibyo bikomoka iwabo.
Guterres yibukije ko isi igifite ibibazo bikomeye by’umutekano, birimo intambara muri Ukraine, ubwicanyi muri Gaza, hamwe n’imvururu muri Sudani, Somalia, Libya, Mali na DR Congo. Yasabye ko Afurika igira ububasha burushijeho mu nama y’umutekano mu Muryango w’Abibumbye, kandi asaba inkunga ihoraho ku bikorwa bya AU byo kugarura amahoro.
Yavuze ko AU na EU bihagarariye 40% by’ibihugu byose by’Umuryango w’Abibumbye, bityo ko bifite ubushobozi bwo guhindura isi, gushyigikira amategeko mpuzamahanga no kubaka ubutabera n’uburinganire. Yongeyeho ko nubwo isi ihanganye n’ibibazo byinshi, bishoboka kubyara igihe gishya cy’icyizere, ubumwe, uburinganire n’amahoro.
