Afurika y’Epfo: Abagore mu myigaragambyo yo kwamagana ihohoterwa rishingiye ku gitsina
Mu rwego rwo kwamagana ihohoterwa rishingiye ku gitsina (GBV), amatsinda aharanira uburenganzira bw’abagore muri Afurika y’Epfo yatangije imyigaragambyo y’igihugu hose, irangira kuri uyu wa Gatanu tariki ya 21 Ugushyingo 2025, mbere y’uko inama ya G20 izabera i Johannesburg itangira.
Abantu benshi ku mbuga nkoranyambaga bamamaje iki gikorwa bakoresheje ry’idoma, bakagaragaza ko baharanira amahoro n’uburenganzira bw’abagore.
Afurika y’Epfo ifite umubare munini w’ihohoterwa rishingiye ku gitsina ku rwego mpuzamahanga, aho imibare ya UN Women n’igipolisi igaragaza ko hagati ya Mutarama na Gashyantare 2025, abagore 137 bishwe, naho barenga 1,000 bafatwa ku ngufu.
Mu myigaragambyo, abagore basabwe kudakora, kutajya ku mashuri cyangwa ku kazi, bakaryama hasi iminota 15 saa sita z’amanywa ku isaha y’iwabo, bambaye imyenda y’umukara, kugira bunamire abishwe.
Iyi myigaragambyo bise G20 Women’s Shutdown, yateguwe n’ishyirahamwe ryitwa “Women for Change”, yerekana ubusabe bw’abarenga miliyoni imwe ko leta yafata ingamba zikomeye mu kurwanya ihohoterwa rishingiye ku gitsina.
Abaharanira uburenganzira bw’abagore bavuga ko nubwo hashyizweho amategeko abarengera, ntiyubahirizwa uko bikwiye, kandi basaba ko leta ifata ingamba zihutirwa. Bamwe mu baturage n’abakora imyuga itandukanye bagaragaje ko bafashe umwanya wo kwifatanya n’abagore muri iyi myigaragambyo kugira barusheho kwamagana ihohoterwa.
Hari n’abigishwa gukoresha imbunda mu kwirwanaho, ariko umuvugizi w’ishyirahamwe “Girls on Fire”, Lynette Oxeley, yasobanuriye BBC dukesha iyi nkuru ko gukoresha imbunda atari cyo gisubizo cya nyuma, ahubwo ko abagore bagomba guhindura imyumvire no kwirinda gucibwa intege n’ihohoterwa.
Uyu muhango w’imyigaragambyo urerekana umuhate w’abagore n’abaharanira uburenganzira bwa bo guharanira amahoro, uburenganzira, no kwirinda ihohoterwa rishingiye ku gitsina mu gihugu.
