Amerika ishobora kwirukana abafite “Green Cards” bo mu bihugu 19
Ubuyobozi bwa Perezida wa Leta Zunze Ubumwe z’Amerika, Donald Trump, bwatangaje ko bugiye kongera gusuzuma amakarita y’icyatsi (Green Cards) yahawe abantu bavuye mu bihugu 19 bimaze igihe bifatwa nk’ibyashyira Amerika mu kaga.
Umuyobozi wa Serivisi z’Abanyamerika zitanga Uburenganzira n’Ubwenegihugu (USCIS), Joseph Edlow, yavuze ko Perezida yamusabye gukora “isesengura ryimbitse kandi rikomeye ku makarita y’icyatsi ya buri muntu ukomoka mu bihugu bifatwa nk’ibiteye amakenga”.
Abajijwe na BBC ibihugu biri kuri urwo rutonde, icyo kigo cyerekana urwandiko rwasohowe n’Ibiro by’Umukuru w’igihugu mu kwezi kwa Kamena, rugaragazamo Afghanistan, Cuba, Haiti, Iran, Somalia na Venezuela.
Ibi bitangajwe nyuma y’uko umunya-Afghanistan ukekwaho kurasa abasirikare babiri i Washington DC, bombi bagakomereka bikomeye. Uwo ukekwaho kubarasa, Rahmanullah Lakanwal, yinjiye muri Amerika mu 2021 binyuze muri gahunda yahaga Abanya-Afghanistan uburinzi bwihariye nyuma y’uko ingabo z’Amerika zivuye muri Afghanistan.
Perezida Trump yavuze ko uko kurasa kwerekanye ikibazo gikomeye cy’umutekano w’igihugu.
Nubwo Edlow yavuze ku kongera gusuzuma Green Cards, ntiyigeze avuga kuri iryo raswa.
Yagize ati: “Ukurinda igihugu n’umutekano w’abaturage b’Amerika ni iby’ingenzi, kandi ntidushobora kongera kwishyura ingaruka z’imyanzuro mibi yafashwe n’ubutegetsi bwabanje ku bijyanye no kwakira abimukira.”
Nta bisobanuro birambuye byatanzwe ku buryo iri suzuma rizakorwa.
Urwandiko rwo muri Kamena Amerika yerekanye ruvuga ko hagamijwe gukumira abashobora guhungabanya umutekano, barimo abakekwaho bikorwa by’iterabwoba n’izindi mpungenge z’umutekano muri rusange.
Bimwe mu bihugu biri kuri uru rutonde kandi bizasuzumwa birimo Burma, Chad, Repubulika ya Congo na Libya.
Uku kurasa kwabaye ku wa Gatatu tariki ya 27 Ugushyingo 2025 kuri abo basirikare kwateye Perezida Trump gukomera ku ijambo, avuga ati: “Ibi byerekana icyago gikomeye kurusha ibindi cyugarije igihugu cyacu. Ubutegetsi bwabanje bwemereye kwinjira abantu bagera kuri miliyoni 20 badasuzumwe, baturutse mu bihugu bitandukanye. Nta gihugu cyakwihanganira ibyago nk’ibi ku mutekano wa cyo.”
Mu cyumweru gishize, USCIS yari yatangaje ko igiye gusuzuma abantu bose bahawe ubuhungiro mu gihe cya Perezida Joe Biden.
Kuri uyu wa Gatatu nanone, Amerika yahagaritse kwakira ibisabwa n’Abanya-Afghanistan bose birimo kwaka ubwenegihugu, ivuga ko iri kubanza gusubiramo igenzura n’umutekano n’umutekano w’uburyo byakorwagamo.
