Amnesty ivuga ko RSF iri gukora ibyaha by’intambara muri Darfur
Umuryango mpuzamahanga uharanira uburenganzira bwa muntu (Amnesty International) yatangaje ko abarwanyi ba “Rapid Support Forces (RSF)”, umutwe wa gisirikare wihariye muri Sudani, bari gukora ibyaha by’intambara mu mujyi wa El-Fasher mu Ntara ya Darfur.
Ibi byashyizwe ahagaragara kuri uyu wa Kabiri tariki ya 25 Ugushyingo 2025, nyuma y’uko RSF itangaje ko yemeye agahenge k’amezi atatu ku mpamvu z’ubutabazi, “kubera ubusabe bw’abanyamahanga” burimo n’ubwa Perezida Donald Trump wa Leta Zunze Ubumwe z’Amerika.
Sudani yinjiye mu kavuyo muri Mata 2023 ubwo amakimbirane hagati y’ingabo za leta ziyobowe na Jenerali Abdel Fattah al-Burhan n’umutwe wa RSF uyobowe na Mohamed Hamdan Daglo (Hemedti) yavaga mu magambo akajya mu ntambara.
Amnesty ivuga ko yabonye ubuhamya bw’abarokotse 28 bavuga ubwicanyi bukorerwa abaturage, gufatwa ku ngufu kw’abakobwa n’abagore, n’ibindi bikorwa bya kinyamaswa. Umuyobozi wa Amnesty, Agnes Callamard, yavuze ko ibyo bikorwa ari ibyaha by’intambara kandi bishobora kuba n’ibindi byaha mpuzamahanga, asaba ko ababigizemo uruhare bose babiryozwa.
Mu Kwakira, RSF yafashe el-Fasher, umujyi wa nyuma ukomeye muri Darfur utari uri mu maboko ya bo. Mu cyumweru gishize, umwe mu bayobozi bo mu Muryango w’Abibumbye bashinzwe gufasha abugarijwe n’inzara cyangwa intambara, Tom Fletcher, yavuze ko uwo mujyi wahindutse “ahantu h’icyaha” kandi ko abagize uruhare muri ibyo bikorwa bagomba kubiryozwa.
Raporo ya Amnesty irimo ubuhamya bw’umugore wavuze ko we n’umukobwa we w’imyaka 14 bafashwe ku ngufu n’abarwanyi ba RSF ubwo bahungaga, umukobwa we akaza gupfira ku bitaro byaTawila. Undi mucikacumu yavuze ko yabonye RSF irasa abasivili bageragezaga guhunga, agira ati: “Baricaga abantu nk’utundi dusimba; nta wari ufite intwaro.”
Imbaraga z’ubuhuza kugeza ubu ntizirabasha guhagarika intambara, impande zombi zikaba zishaka kubanza kunguka ku rugamba.
Ku Cyumweru tariki ya 23 Ugushyingo 2025, Burhan yanze icyifuzo cy’agahenge cya Leta Zunze Ubumwe z’Amerika cyatanzwe n’itsinda rya Quad (Leta Zunze Ubumwe z’Amerika, Saudi Arabia, Misiri na Leta Zunze Ubumwe z’Abarabu), avuga ko “ribogamye” kuko Leta Zunze Ubumwe z’Abarabu ashinja gushyigikira RSF. Leta Zunze Ubumwe z’Abarabu zo zikomeza guhakana kugira uruhare mu ntambara, ndetse ejo hashize zashinje Burhan “gukunda kubangamira ibiganiro.”
