BBC Gahuza igiye kwimurira icyicaro i Nairobi
Ikigo cy’Itangazamakuru cy’Ubwongereza, BBC, cyatangaje ko ishami rya cyo ryo mu Kinyarwanda no mu Kirundi, BBC Gahuzamiryango, rigiye kwimurirwa mu mujyi wa Nairobi muri Kenya, aho rizatangira kuvugira ku mugaragaro kuva ku wa 3 Ukuboza 2025.
Ibi byemejwe n’ubuyobozi bwa BBC binyuze mu itangazo bashyize ku rubuga rwa yo, rivuga ko kwimura ibikorwa biri mu rwego rwo kunoza imikorere, kwegerana n’abaturage bo mu karere no guhuza ibikorwa remezo n’ibyifuzo by’abumva gahunda za BBC Gahuza.
Bavuze ko ikitezwe nyuma yo kwimurira ibiganiro i Nairobi, ari ikipe nshya y’abanyamakuru, ibiganiro binoze kurushaho, kurushaho kumva ibyifuzo n’ibitekerezo by’ababakurikira hamwe no kubiha umwanya.
BBC Gahuza imaze imyaka irenga 30 ikorera i Londres mu Bwongereza, ari na ho yakoreraga kugeza ubu. Mu gihe cy’iyo myaka ishize, iki kiganiro cyabaye imwe mu nzira zikomeye zo kugeza amakuru ku baturage benshi bo mu Rwanda, u Burundi n’ahandi mu karere k’ibiyaga bigari, binyuze mu majwi y’abanyamakuru ba yo bakorera i Londres no mu bihugu bitandukanye byo mu karere.
Abakozi bamwe ba BBC Gahuza bazakomereza akazi i Nairobi, mu gihe abandi bazakomeza gukorera mu tundi duce tw’Afurika y’Iburasirazuba, byose bigamije ko gahunda za yo zigera ku baturage neza kurusha mbere.
Ukwimurira BBC Gahuza i Nairobi ni imwe mu mpinduka zitandukanye BBC iri gukora mu mashami ya yo hirya no hino mu rwego rwo kunoza uko ikwirakwiza inkuru ku rwego mpuzamahanga no kugabanya ibiciro by’imikorere bikomoka ku gukorera ku mugabane w’Uburayi.
