Bobi Wine afungiye ahantu hatazwi
Ishyaka rya politiki rya Bobi Wine ryatangaje ko umukandida wa ryo ku mwanya w’Umukuru w’Igihugu muri Uganda yakuwe iwe ku ngufu, atwarwa ahantu hatazwi hakoreshejwe indege ya kajugujugu y’ingabo.
Ishyaka National Unity Platform (NUP) ryabitangaje binyuze ku rubuga nkoranyambaga ku wa Gatanu w’ejo hashize, umunsi umwe nyuma y’uko Abagande batoye mu matora yabaye mu mwuka w’igitutu n’impungenge, by’umwihariko mu gihe interineti yari yaciwe mu gihugu hose.
Kugeza ubu, ubutegetsi bwa Uganda ntiburagira icyo butangaza kuri ibi byabaye.
Bobi Wine, ufatwa nk’umuyobozi mukuru w’abatavuga rumwe n’ubutegetsi muri Uganda, yari ahanganye na Perezida Yoweri Museveni umaze igihe kinini ku butegetsi, mu matora Umuryango w’Abibumbye wavuze ko yaranzwe n’itotezwa rikabije n’iterabwoba byibasiye abatavuga rumwe n’ubutegetsi.
Avuga ari i Kampala mugitondo cyo ku wa Gatandatu, umunyamakuru wa Al Jazeera dukesha iyi nkuru, Catherine Soi, yatangaje ko ihagarikwa rya interineti ryatumye bigorana kumenya aho Bobi Wine aherereye. Yavuze ko umwe mu bayobozi ba NUP wavuganye na Al Jazeera yemeje gusa ko “abagabo basaga n’abasirikare n’abandi bashinzwe umutekano basimbutse uruzitiro rw’urugo rwa Bobi Wine”.
Icyakora, uwo muyobozi ntiyashoboye kwemeza niba Bobi Wine yari ari iwe cyangwa niba yarajyanywe. Soi yongeyeho ko Al Jazeera yananiwe kuvugana n’ingabo cyangwa na polisi ya Uganda ngo bemeze ibyabaye.
Yagaragaje kandi ko nyuma gato y’itora ryo ku wa Kane, Bobi Wine yanditse ku rubuga rwe rwa X (rwahoze ari Twitter) avuga ko mu gihugu hose hamenyekanye ibikorwa byo kongeramo impapuro z’itora mu buryo bunyuranyije n’amategeko.
Yanasabye Abagande “guhagurukira hamwe bakamagana ubutegetsi bw’abagizi ba nabi”. Ibi yabivuze mu gihe ubutegetsi bwa Museveni bumaze imyaka bwinjirwa mu majwi yo gukandamiza abatavuga rumwe na bwo n’ababashyigikiye.
Perezida Museveni w’imyaka 81 arashaka kongera manda, akazuzuza hafi imyaka 40 ku butegetsi. Mbere y’amatora yo muri iki cyumweru, yari yavuze ko yiteze kubona nibura amajwi 80 ku ijana.
Mu gihe amajwi yakirwaga ku wa Gatanu, Museveni yari imbere n’amajwi 73.7 ku ijana, mu gihe Bobi Wine yari afite 22.7 ku ijana, hakiriwe hafi amajwi 81 ku ijana. Ibyavuye mu matora by’agateganyo byari biteganyijwe gutangazwa saa kumi z’umugoroba (16h00) ku isaha ya Kampala, ni ukuvuga saa moya z’ijoro ku isaha mpuzamahanga (GMT).
Nubwo ubukangurambaga bw’amatora bwaranzwe n’imvururu ndetse n’itabwa muri yombi ry’abashyigikiye abatavuga rumwe n’ubutegetsi, ku wa Kane itora ryabaye mu mutuzo. Ariko, mu ijoro ryakurikiye itora, abantu nibura barindwi baguye mu mvururu zabereye mu mujyi wa Butambala, uri mu bilometero 55 mu majyepfo ashyira uburengerazuba bwa Kampala.
Umuvugizi wa polisi mu gace ka ho, Lydia Tumushabe, yavuze ko “abajura b’abanyapolitiki” bo mu batavuga rumwe n’ubutegetsi bitwaje imihoro, bavuga ko bayobowe n’umudepite Muwanga Kivumbi, bateye sitasiyo ya polisi n’ikigo cyo kubaruriramo amajwi.
Kivumbi, uri mu ishyaka rya Bobi Wine, yavuze ko inzego z’umutekano ari zo zagabye igitero ku bashyigikiye abatavuga rumwe n’ubutegetsi bari bateraniye iwe bategereje ibisubizo by’amatora. Yavuze ko abantu 10 bahasize ubuzima.
Yagize ati: “Nyuma yo kubica, ingabo zakomeje kurasa, kandi zemeje ko zisibanganya ibimenyetso byose by’abapfuye. Icyasigaye ni amaraso yamenetse gusa,” nk’uko yabitangarije ikigo ntaramakuru AFP.
