Burundi: Batunzwe no kubyina nyuma yo kureka kubumba inkono
Esther Manirumva avuga ko yahoraga abumba ariko Imana yamufashije kubivamo ubu akaba atunzwe no kubyina. ahoraga mbumba ariko ubu simperutse.
Uyu ni umwe mu bagore b’Abatwa batunzwe n’umwuga wo kubyina, batuye mu Mudugudu wa Mubuga, komine Kayanza, mu Ntara ya Butanyerera.
Uyu mugore w’imyaka 23 avuga ko ubu umuziki ari wo utunze abana be batatu. Ati: “Ubu meze neza. Njya kuvoma, nkoga, hanyuma nkajya kubyina. Ni wo mwuga wanjye.”
Esther n’abandi Batwakazi bane bibumbiye mu itsinda ryitwa “Afrimamas”. Kugera aho batuye uvuye i Bujumbura bisaba urugendo rurenze ibirometero 100. Ni mu misozi miremire imodoka itageramo.
Kubumba ni umwuga wa kera w’Abatwa mu Burundi. Ariko aba Afrimamas bo bahisemo inzira itamenyerewe: gutunga imiryango ya bo binyuze mu kubyina indirimbo zigezweho nka Afrobeat, Amapiano n’izindi.
Babyina bambaye imyambaro y’abagore isanzwe cyangwa imyambaro y’imbyino, kandi abantu bakunda uburyo babyina mu buryo buteye kimwe. Ibyo babyina babishyira ku mbuga nkoranyambaga za TikTok, Facebook, Snapchat na YouTube.
Babyina bishimye kandi baseka, abantu bagahurura baza kubareba. Mu mezi arindwi bamaze batangiye, bakurikirwa n’abantu benshi cyane: abarenga miliyoni kuri TikTok n’abarenga ibihumbi 300 kuri Facebook. Ibi byatumye batangira guhabwa akazi ko kuryoshya ibirori, bakishyurwa, ndetse no gukorana n’abahanzi batandukanye. Uretse ayo bakorera mu bitaramo, n’imbuga nkoranyambaga zibinjiriza amafaranga.
Rachelle Mugisha, ufite imyaka 18, umwe muri bo, avuga ko ubuzima bwe bwahindutse cyane. Ati: “Nta kibazo ngifite cyo kwigurira imyenda. Imipira igezweho abandi bambara nanjye ndaymbara. Ubu ngura igitenge kirimo bitatu.” Avuga kandi ko umwana we na we atagifite ikibazo cy’imyambaro, ati: “Yavukaga akambara ibishaje, bikansaba kujya gusabiriza. Ariko ubu bimeze neza.”
Uwashinze iri tsinda ni Eddy Fredol Uwiyera, ufite imyaka 22. Asobanura ko bahisemo kutabyina imbyino gakondo z’Abatwa kugira ngo bajyane n’igihe kandi bakurure abantu benshi. Ati: “Bituma tubona inyungu.” Avuga kandi ko bazakomeza kugeza aho ibikorwa by’aba bagore bizagera mu mpande zose z’isi.
Mu Burundi, Abatwa bafatwa nk’itsinda rifite imibereho iri inyuma, ritunzwe cyane no kubumba—umwuga urimo kugenda uzimangana kubera ibikoresho byinjizwa mu gihugu bituma inkono za bo zitagikorwa. Ariko abagize Afrimamas bo bashobora kuzaba urugero rw’Abatwa bake babashije guhindura imibereho binyuze mu bundi buryo bushya bwo kwiteza imbere.
