Bwa mbere mu myaka 300, Thailand yibasiwe n’umwuzure udasanzwe

Umwuzure ukomeye wibasiye Thailand, umaze guhitana abantu 33, ndetse utuma igihugu cyohereza ingabo, amato ya gisirikare na kajugujugu mu bikorwa by’ubutabazi.

Imvura idasanzwe imaze icyumweru yibasira intara 10 zo mu majyepfo y’igihugu. Umujyi wa Hat Yai wagize imvura nyinshi kurusha mu myaka 300, aho hagwa milimetero 335 ku munsi umwe. Amafoto yagaragaye yerekana imodoka n’inzu byarengewe n’amazi, abaturage bakirirwa ku bisenge by’inzu bategereje ubutabazi kuko hari aho amazi yageze ku igorofa rya kabiri ku nzu z’amataji.

Ibindi bihugu bituranye na Thailand, na byo byibasiwe n’umwuzure:

• Vietnam: Abantu 98 bapfuye mu cyumweru kimwe.
• Malayiziya: Abantu 19,000 bimuwe mu ngo za bo.
• Indoneziya: Abantu 19 barapfuye, abandi barindwi bagwiriwe n’inkangu muri Sumatra.

Muri Thailand, abantu miliyoni 2 bamaze kugerwaho n’ingaruka z’uyu mwuzure ariko 13,000 gusa ni bo bimuwe. Abandi benshi baracitse ku muryango. Ingabo ziri ku isonga mu gutabara, zitegura kohereza ubwato bunini butwaye kajugujugu z’ubutabazi, amato 14, batekera abantu 3,000 bakeneye ubufasha ku munsi, ndetse n’ubwato bushobora guhindurwa ibitaro.

Guverineri w’Intara Songkhla, yatangaje ko kugira ngo abantu babone ubutabazi bwihuse muri iyi ntara, nk’ahantu hibasiwe n’umwuzure, inzego z’ubutabazi ziri gukoresha amato, imodoka ndende, n’ubwato buto bufite moteri ifite imbaraga mu kubakura mu mazi.

Abakorerabushake bo mu kigo cya Matchima Rescue Center bavuze ko bakiriye abantu ibihumbi ku murongo wa telefoni mu minsi itatu bashaka ubutabazi. Hari abamaze iminsi nta biribwa cyangwa amazi bafite. Hari n’amashusho agaragaza abana batatu barekereje ku nsinga z’amashanyarazi barwana no kurokoka.

Muri Malayiziya, abantu 19,000 bamaze kwimurwa, hashyirwaho ibigo 126 byakira abahuye n’ibiza, naho inzego z’ubutabazi zikagenda mu mazi maremare zirokora abaturage.

Nubwo imvura nyinshi isanzwe muri aka gace muri iki gihe cy’umwaka, uyu mwaka yarushijeho kuba nyinshi bidasanzwe, bituma umwuzure ugira ingaruka zikomeye mu karere k’Aziya y’Amajyepfo y’uburasirazuba.

Bari gukoresha ubwato mu kurokora abantu