Byibuze abana 67 b’Abanya-Palestine biciwe muri Gaza kuva imirwano yahagarara
Ishami ry’Umuryango w’Abibumbye rishinzwe kurengera no guteza imbere uburenganzira bw’abana (UNICEF), ritangaza ko nibura abana 67 b’Abanyapalestina bamaze kwicirwa muri Gaza nubwo hari amasezerano yo guhagarika imirwano yashyizweho umwaka ushize ku bufatanye na Leta Zunze Ubumwe z’Amerika.
Muri abo harimo uruhinja rw’umukobwa rwiciwe mu gitero cy’indege cya Isirayeli cyo mu gace ka Khan Younis, ndetse n’abandi bana barindwi bari bishwe umunsi wabanje.
UNICEF ivuga ko ibi byose bikomeje kuba mu gihe cy’agahenge, kandi ko buri mwana wishwe yari afite umuryango n’ejo hazaza. Kuva intambara yatangira mu 2023, UNICEF iheruka gutangaza ko abana basaga 64,000 bamaze kwicwa no gukomereka.
“Save the Children” na yo ivuga ko buri kwezi abana 475 bahura n’ubumuga bwa burundu, kandi Gaza yabaye ahantu hari umubare munini w’abana bahungabanye utigeze ubaho mu mateka.
Isirayeli irashinjwa gukoresha inzara nk’intwaro y’intambara, ikomeretsa abana cyane. Nubwo hari amasezerano yo guhagarika imirwano, Isirayeli yakomeje ibitero ivuga ko byatewe no kuraswa n’inyeshyamba za Hamas muri Khan Younis, ibintu Hamas yahakanye, ivuga ko ibyo bitero ari indi ntambwe igaragaza ko Isirayeli ishaka gukomeza “itsembabwoko”.
Abaganga batagira umupaka bazwi nka MSF batangaje ko bakiriye abagore n’abana bafite ibikomere bikomeye, barashwe mu mutwe no mu ngingo. Abaturage basigaye babayeho mu bibazo bikomeye byo kubura inkambi, amahema, ibiribwa n’ubutabazi bwihutirwa.
UNICEF ivuga ko abana benshi baryama hanze batagira aho bikinga kandi baterwa ubwoba n’ibitero bikomeje.
UNICEF isaba ko ubufasha bwinjizwa muri Gaza bwiyongera, ikavuga ko nta hantu hizewe ku bana ba Gaza kandi ko isi itagomba gukomeza kwemera ko babaho muri ubu buribwe butagira iherezo.
