FARDC ishinja M23 kwigaragaza mu itangazamakuru ibeshya ko yavuye Uvira

Ingabo za Repubulika Iharanira Demokarasi ya Congo (FARDC) zatangaje ko umutwe wa AFC/M23 wabeshye uvuga ko wavuye mu mujyi wa Uvira, zivuga ko nta mpinduka zabaye.

Mu itangazo ryanyujijwe kuri RTNC ku wa Gatandatu, umuvugizi wa FARDC Maj Gen Sylvain Ekenge yavuze ko “ibivugwa byo kuva muri Uvira bidahuye n’ukuri kugaragara ku rubuga”, abifata nk’amayeri yo kwiyereka itangazamakuru no kubeshya amahanga.

Yongeyeho ko ibi byerekana, nk’uko abivuga, “uburyarya” mu kubahiriza amasezerano y’amahoro y’i Washington yasinywe na Perezida Paul Kagame na Félix Tshisekedi ku bufasha bwa Perezida w’Amerika Donald Trump.

Kinshasa n’impuguke za ONU bakomeje gushinja u Rwanda gufasha M23 mu buryo butandukanye, ibyo Kigali ihakana ivuga ko yashyizeho gusa ingamba z’ubwirinzi, mu gihe na yo ishinja Kinshasa gukorana na FDLR—ibyo leta ya DRC na yo ihakana, ikavuga ko nta gahunda ya leta yo gukorana n’uwo mutwe ihari.

Ku rundi ruhande, Oscar Balinda, umuvugizi wa M23, yabwiye BBC Gahuzamiryango ko uwo mutwe wamaze kuva muri Uvira, agira ati: “Twe tuzi ko twavuyemo… hari itangazamakuru ririho rwarabibonye.”

Yashinje FARDC n’abafatanyije na yo kugaba ibitero ku barwanyi ba M23 bari mu rugendo rwo kuhava, ariko FARDC ntiyasubije kuri icyo kirego, naho Balinda ntiyatangaza aho ingabo za M23 ziherereye kubera impamvu z’umutekano.

Maj Gen Ekenge we yavuze ko ayo magambo ari “ukujijisha” agamije kugabanya igitutu.

Muri urwo rwego, Amerika yasabye mu Kanama k’Umutekano ka ONU ko M23 iva “aka kanya” muri Uvira ikajya nibura ku ntera ya kilometero 75.

Umusesenguzi Prof. Jason Stearns yavuze ko gufata Uvira byabaye ku wa 10 byari kwagura cyane ubutaka M23 igenzura kuva yafata Bukavu na Goma.

Iyi ntambara yongeye kubura mu mpera za 2021, mu gihe amasezerano y’amahoro hagati y’u Rwanda na DRC akomeje gushakirwa uko yashyirwa mu bikorwa.