“Goma iri mu biganza by’abantu runaka, genda uvugane na bo”-Perezida Kagame
Perezida Paul Kagame yasobanuye ko Umujyi wa Goma, mu burasirazuba bwa Repubulika Iharanira Demokarasi ya Congo (RDC), utagomba kwitirirwa u Rwanda mu bibazo by’amabuye y’agaciro n’umutekano kuko ufite abawucunga.
Ibi yabitangaje mu kiganiro yagiranye n’abanyamakuru kuri uyu wa Kane tariki ya 27 Ugushyingo 2025, ku kibazo yari abajijwe cy’ifungurwa ry’ikibuga cy’indege mpuzamahanga cya Goma kimaze iminsi kibazwa n’amahanga.
Yagize ati: “Niba hari ushaka Goma nta kibazo, ku mpamvu izo ari zo zose, zaba ari izijyanye n’imigenzo cyangwa se niba hari abemerera mu marozi. Goma iri mu biganza by’abantu runaka, genda uvugane na bo.”
Yongeyeho ati: “Ndamutse ari jye ugenzura Goma, ukaza ukavuga ngo urashaka kugenzura Goma, navuga nti: ‘Nta kibazo, ubu iri mu biganza byanjye, ntabwo ndi buyiguhe utanyeretse uko uri bukemure ibibazo byanjye’”.
Perezida Kagame yanasobanuye ko abanyaburayi bakunze gushyira u Rwanda mu kibazo cy’amabuye y’agaciro muri RDC, nyamara ari bo bakwiye kubanza kureba uruhare rwa bo mu gusahura no gucuruza ayo mabuye, aho bamaze igihe kirekire bayakoresha mu mijyi ya bo nka Antwerp mu Bubiligi.
Yavuze kandi ko u Rwanda rwanyuze mu mucyo mu kugurisha amabuye y’agaciro ku isoko mpuzamahanga, kandi ko nta sano bifitanye n’intambara zivugwa mu karere. Perezida Kagame yagaragaje ko hari igihe habaho gukabiriza kw’Abanyaburayi, abantu bakumva ko ibyo bavuga ari ukuri nyamara ari bo ubwa bo bafite uruhare runini mu byo bavuga.
Imibare ya 2024/2025 igaragaza ko amabuye y’agaciro u Rwanda rwohereje mu mahanga yarwinjirije miliyari 1,7 $, mu gihe Leta ikomeje gushyira imbaraga mu guteza imbere ubucukuzi bwa kinyamwuga n’inganda zitunganya amabuye y’agaciro.
