ICC yateye utwatsi ubujurire bwa Duterte wayoboye Filipiine
Urukiko Mpuzamahanga Mpanabyaha (ICC) rwemeje ko rwanze icyifuzo cyo kurekura uwahoze ari Perezida wa Filipine, Rodrigo Duterte, ubu uri gukurikiranwaho ibyaha byibasiye inyokomuntu.
Mu cyemezo cyasohotse kuri uyu wa Gatanu tariki ya 28 Ugushyingo 2025, Urwego rw’Ubujurire rwa ICC rwatesheje agaciro impamvu zose eshatu abunganira Duterte bari batanze basaba ko arekurwa, ruvuga ko hari ibyago byo gutoroka cyangwa kwirinda kuburanira mu rukiko.
Perezida w’Urwego rw’Ubujurire rwa ICC, Umucamanza Luz del Carmen Ibanez Carranza, yagize ati: “Kuko impamvu zose z’ubujurire twazanze, twemeje icyemezo cyatangajwe mbere”.
Urukiko rwongeyeho ko Duterte, wahoze ari Perezida wa Filipine kandi akaba yarongeye gutorerwa kuyobora Umujyi wa Davao, ashobora gukoresha imyanya ya politiki kugira ngo yirinde kubiryozwa.
Ishyirahamwe ry’Abanyamategeko rihagarariye imiryango y’abaguye mu mukwabu wo kurwanya ibiyobyabwenge — NUPL — ryakiriye neza iki cyemezo, rivuga ko gufungwa kwe bituma abahohotewe n’abatangabuhamya bumva batekanye. Bagize bati: “Bituma adashobora gutera ubwoba abantu, kubangamira ibimenyetso cyangwa guhungabanya urubanza”.
Umuryango wa Duterte watangaje ko wemeye iki cyemezo mu mutuzo, kandi ko uzakomeza gukorana n’abamwunganira mu mategeko.
Abunganira Duterte bari bajuririye icyemezo cyo mu Kwakira cyamugumishaga mu maboko y’urukiko, nyuma y’uko abacamanza bagaragaje ko ashobora kwanga kugaruka kuburana kandi akaba yakoresha ububasha bwe mu gutera ubwoba abatangabuhamya.
Abashinjacyaha ba ICC bavuga ko Duterte yagize uruhare mu kwica abantu benshi mu bikorwa byo kurwanya ibiyobyabwenge, ubwo yari Meya wa Davao ndetse no mu gihe yayoboraga igihugu kuva 2016–2022.
Mu nyandiko z’urukiko, Duterte ashinjwa ko yategetse kandi aha uburenganzira ibikorwa by’urugomo birimo no kwica abantu bakekwagaho icuruzwa n’ikoreshwa ry’ibiyobyabwenge.
Umubare w’abishwe mu gihe cy’ubutegetsi bwe uratandukanye: Polisi ivuga abarenga 6,000, ariko imiryango iharanira uburenganzira bwa muntu ivuga ko bashobora kugera ku 30,000.
Imiryango y’abahuye n’ingaruka z’ayo mahano bakiriye neza ifatwa rya Duterte mu kwezi kwa Werurwe. Ubu amaze amezi arenga umunani afungiwe i La Haye.
Abamwunganira bavuga ko arembye, ko kuguma afunze ari “ubugome”, ndetse ko atashobora gufasha abamwunganira kubera ikibazo cy’ubushobozi bwo gutekereza neza. Ariko umuryango we wamusuye wemeje ko ameze neza kandi ko agishobora kuganira.
Visi Perezida Sara Duterte, na we yaramusuye maze abwira abakunzi ba se ko bashobora “kujya kumurekura” mu buryo yasaga n’uwashishikariza imyigaragambyo yo kumufungura ku ngufu.
Mu kwezi gushize, urukiko rwanze icyifuzo cyo kuvuga ko rutemerewe kuburanisha iki kirego.
Mbere yo gutangaza umwanzuro, umunyamategeko w’uburenganzira bwa muntu, Kristina Conti, wari uhagarariye imiryango y’abahohotewe, yavuze ko yari afite icyizere kirenga 99% ko ubujurire bwa Duterte butazemerwa. Ati: “Hari ibimenyetso bikomeye byemeza ko agomba kuguma afunze.”
ICC yatangaje mu 2018 ko igiye gutangiza iperereza ku bwicanyi bwakozwe mu gihe Duterte yari ku butegetsi. Mu kwezi kwakurikiyeho, Duterte – wari ukiri perezida – yatangaje ko Filipine ivuye mu ICC, ibintu abaharanira uburenganzira bwa muntu bise ukumva ko ashaka guhunga ubutabera.
Ibyaha akurikiranweho bikubiyemo ibikorwa byo kuva ku wa 1 Ugushyingo 2011, ubwo yari Meya wa Davao, kugeza kuwa 16 Werurwe 2019, umunsi igihugu cye cyavuye mu ICC.
