Igitaramo cyanjye si icya politiki-King Saha
Umuhanzi King Saha w’Umugande aritegura gukora igitaramo kuri uyu wa Gatanu, tariki 21 Ugushyingo 2025, kuri Lugogo Cricket Oval.
Nubwo azwiho gushyigikira ishyaka rya “National Unity Platform (NUP)” ritavuga rumwe n’ubutegetsi bwa Perezida Museveni, Saha yavuze ko igitaramo atari igikorwa cya politiki kandi ko kigenewe Abanya-Uganda bose, hatitawe ku myemerere ya bo ya politiki.
Mu kiganiro yagiranye n’abanyamakuru, King Saha yashimangiye ko umuziki ugomba guhuza abantu, aho kubatandukanye, kandi asaba abafana bo mu bice byose by’igihugu kuza kwifatanya mu kwizihiza icyo gitaramo.
Yagize ati:”Nshyigikiye Bobi Wine na National Unity Platform, ariko igitaramo kigenewe abafana banjye bose mu gihugu hatitawe ku myumvire ya politiki. Nimuzaze tukizihirize hamwe kuko iki ni igikorwa cyacu twese.”
Iki kizaba ari igitaramo cya kabiri cya King Saha akoreye kuri Lugogo Cricket Oval muri uyu mwaka, nyuma y’igitaramo cya mbere cyabaye muri Mutarama.
Uyu muhanzi avuga ko yizeye ko kizitabirwa n’abantu benshi, kandi akomeje kwagura izina rye no gushyira ikimenyetso mu ruganda rw’umuziki muri Uganda.
King Saha yamenyekanye mu ndirimbo zitandukanye zirimo “Empeta” yakoranye na Sheebah, “Zakayo”, “Ebiseera Ebyo”, “Ow’Omukwano” n’izindi zitandukanye.
