Igitero gishya cy’Uburusiya kuri Kyiv cyari simusiga

Igitero gishya cy’Uburusiya cyagabwe kuri Kyiv mu ijoro rishyira ku wa Gatandatu tariki ya 29 Ugushyingo 2025, cyari kigizwe n’indege zitagira abapilote (drones) n’ibisasu bya misile byarashwe ku bice bitandukanye by’umurwa mukuru. Byahitanye nibura abantu babiri, mu gihe abandi benshi bakomereka.

Nk’uko Minisiteri y’Ingufu ya Ukraine ibivuga, abantu basaga 500,000 bo muri Kyiv bagizweho ingaruka n’iki gitero naho ibihumbi 100 babura umuriro w’amashanyarazi. Mu mujyi wa Kharkiv naho hafi abantu 8,000 bagizweho ingaruka n’iki gitero.

Mu mujyi wa Kyiv, nibura ahantu hatandatu hararashwe, harimo n’inzu y’amagorofa ituwemo n’abaturage yibasiwe na drones, nk’uko byemejwe na Tymur Tkatsjenko, uyobora ingabo muri uwo mujyi.

Minisitiri w’Ububanyi n’Amahanga wa Ukraine, Andrij Sybiha, yanditse ku rubuga rwa X agaragaza ko Uburusiya bwakomeje kurasa misile zisaga mirongo na drones zirenga 500 ku nyubako z’abaturage, ibikorwa-remezo n’amashanyarazi. Avuga ko Uburusiya bukomeje kwica no gusenya mu gihe isi iri mu biganiro by’amahoro.

Perezida Volodymyr Zelenskyj yavuze ko misile 36 na drones hafi 600 ari byo byifashishijwe muri icyo gitero, nk’uko BBC na Reuters babyemeza.

Iki gitero kibaye icya kabiri kigabwe kuri Kyiv mu gihe cy’iminsi ine gusa. Ku wa Kabiri, abantu barindwi barishwe mu kindi gitero cyari kigizwe na misile n’indege zitagira abapilote. Ibisigazwa by’umubiri w’umuntu umwe byakuwe mu nyubako yari yafashwe n’inkongi, mu gihe umwana umwe na we yakuwemo ari muzima.

Umwana w’imyaka 13 ari mu bakomeretse, nk’uko byatangajwe n’Umuyobozi w’Umujyi wa Kyiv, Vitalij Klitsjko.

Humbikanye urusaku rw’ibiturika, ndetse ibice bya drones byagwaga hasi. Ingabo zirwanira mu kirere zahise zihagurukira kwirwanaho, abaturage basabwa guhungira mu bwihisho, naho abataragerayo barakangurirwa gushaka aho bikinga vuba.

Igitero cy’Uburusiya muri Kyiv cyatumye abantu 100,000 babura umuriro w’amashanyarazi