Indonesia: Abishwe n’umwuzure bamaze kurenga 500
Umubare w’abamaze guhitanwa n’umwuzure wibasiye Indonesia mu cyumweru gishize umaze kurenga 500, naho abandi barenga 500 baburirwa irengero.
Abarenga miliyoni 1.4 bo mu ntara eshatu — Aceh, Sumatra y’Amajyaruguru n’iyUburengerazuba — ni bo bagizweho ingaruka zikomeye, hakaba n’ibihumbi by’abaturage bakigendagenda mu bice bitagerwamo n’imodoka ndetse badafite ibiribwa n’ibindi by’ibanze.
Uyu mwuzure watewe n’umuyaga mwinshi cyane waturutse mu muyoboro w’amazi yo mu nyanja y’Abahinde wa Malacca, wibasiye ibihugu bitandukanye by’Aziya birimo na Thailand, Malaysia na Sri Lanka.
Mu karere kose y’amajyepfo n’amajyepfo y’uburasirazuba bw’Aziya, abantu bagera ku 1,100 bishwe n’imyuzure n’inkangu mu cyumweru gishize. Muri Sri Lanka, hafi 355 barahitanywe n’ibi biza, naho muri Thailand umubare w’abapfuye wageze nibura kuri 176.
Abaturage bo muri Indonesia bavuga ko amazi yabagezeho “nk’inkubi y’umuyaga imeze nka Tsunami”. Amwe mu mashusho agaragaza imihanda yangiritse, ibiraro byasenyutse, imihanda yuzuye ibyondo n’amabuye n’ibiti byangiritse.
Mu gace k’uburengerazuba bwa Sumatra, abaturage baracyashakisha imiryango ya bo yahitanywe n’inkangu n’ibyondo byazanywe n’amazi menshi.
Abaganiriye na BBC bavuga ko abenshi bamaze iminsi 2–3 batarya, kandi n’imfashanyo ntibageraho kubera isenyuka ry’imihanda. Bamwe bavuga ko batangiye kurwanira ifunguro ryihuse.
Mu duce tumwe na tumwe, abaturage bibasaba kugenda ibirometero bashaka umurongo wa interineti, amazi meza cyangwa ubufasha bw’ibanze. Mu gace ka Aceh yo hagati abaturage ibihumbi baba batonze umurongo bashaka gukoresha ibikoresho by’umuyoboro wa interineti wa Starlink bashyiriweho n’ubuyobozi kugira ngo babone uko bavugana n’imiryango.
Abaturage bafite kurakara kubera uburyo guverinoma yitwara mu gukemura iki kibazo, aho bavuga ko harimo gutinda gutanga inkunga bitewe n’inzitizi z’ubuyobozi butanga serivisi nabi. Perezida Prabowo Subianto yasuye ibice byibasiwe n’ibiza kuri uyu wa Mbere tariki ya 1 Ukuboza 2025, yemera ko imihanda myinshi itari gukoreshwa ariko avuga ko “hari guykorwa ibishoboka byose ngo yongere ibe nyabagendwa”.
