Inteko Ishinga Amategeko ya DRC igiye kwiga ku masezerano y’amahoro ya Washington

Inteko Ishingamategeko ya Repubulika Iharanira Demokarasi ya Congo uyu munsi iratangira kuganira ku masezerano y’amahoro ya Washington, yasinywe umwaka ushize hagati ya leta ya RDC n’iy’u Rwanda.

Ibiro bya Perezida Félix Tshisekedi byatangaje ko yakiriye abayobozi b’inteko, umutwe w’abadepite Aimé Boji Sangara n’umuyobozi wa Sena Jean-Michel Sama Lukonde, kugira ngo baganire ku ishyirwa mu bikorwa ry’ayo masezerano nk’uko tubikesha BBC.

Amasezerano ya Washington yari yasinywe muri Nyakanga umwaka ushize, maze yemezwa mu Kuboza 12 na ba Perezida Paul Kagame na Félix Tshisekedi, bari kumwe na Donald Trump mu nyubako yari imaze guhindurirwa izina ikitwa “Donald J. Trump Institute of Peace,” hafi y’ibiro bye.

Abaturage bugarijwe n’intambara mu burasirazuba bwa Congo bari bizeye ko ayo masezerano azahagarika imirwano, nk’uko Perezida Trump yari yabisezeranyije. Ariko kugeza ubu, intambara ntiyigeze igabanuka cyane.

Leta ya Kinshasa ishinja umutwe wa AFC/M23 gukomeza guhonyora ayo masezerano, ivuga ko ifashwa n’ingabo z’u Rwanda, mu gihe M23 na yo ishinja leta kuba ari yo ikomeje kurenga ku masezerano y’agahenge no gukoresha indege zitagira abapilote (drones) mu mirwano.

Ntihazwi neza umwanzuro w’Inteko Ishingamategeko kuri aya masezerano y’amahoro, ndetse n’ingaruka zishobora kugira ku mibanire y’ubukungu n’ubucuruzi hagati ya Kinshasa na Washington.