Iran ivuga ko iri kuribwaribwa “itegereje” ko ingabo z’Amerika zaza ku butaka

Intambara iri hagati ya Iran, Israel n’Amerika ikomeje gufata indi ntera ikomeye, nyuma y’uko Iran itangaje ko ingabo za yo ziteguye guhangana n’ingabo z’Amerika zaba zigeze ku butaka bwa yo.

Umuyobozi w’Inteko Ishinga Amategeko ya Iran yavuze ko ingabo za Iran “zitegereje ko abasirikare b’Amerika baza ku butaka kugira ngo babahanishe bikomeye.” Yongeyeho ko Iran ifite ibisasu byose byiteguye kandi ko ubushake bwo kurwana bwiyongereye.

Ibi bibaye mu gihe Amerika iri gukomeza kohereza ingabo nyinshi mu burasirazuba bwo hagati, harimo abasirikare ba Marines ibihumbi byinshi bamaze kugera mu karere. Hari raporo zigaragaza ko Pentagon iri gutegura uburyo bwo gukora ibitero byo ku butaka muri Iran, nubwo bitarafatwaho icyemezo cya nyuma.

Abasesenguzi bavuga ko aya magambo ya Iran ari ubutumwa bwo gutera ubwoba Amerika no kuyibuza gutekereza ku kohereza ingabo ku butaka. Iran isanzwe ikoresha uburyo bwo kurwana butandukanye burimo misile, drones ndetse n’imitwe iyishyigikiye mu bindi bihugu.

Iyi ntambara ntigarukira muri Iran gusa, kuko yageze no mu bindi bihugu byo mu karere nka Iraq, Lebanon na Yemen. Umutwe wa Houthis na wo watangiye kugaba ibitero kuri Israel.

Ibi byatumye iyi ntambara ifata isura y’intambara y’akarere ishobora kugira ingaruka zikomeye ku bukungu bw’isi yose, cyane cyane ku biciro bya peteroli n’ubwikorezi bwo mu nyanja.

Kugeza ubu, Amerika iravuga ko ishaka amahitamo menshi arimo n’ibitero byo ku butaka, mu gihe Iran yo ivuga ko yiteguye guhangana n’ibyo byose.

Abahanga bavuga ko intambara yo ku butaka yaba ari intambwe ikomeye cyane ishobora gutuma iyi ntambara iba ndende kandi ikaba mbi kurushaho.

Nubwo hari imbaraga zo gushaka ibiganiro by’amahoro, nta kimenyetso kiragaragaza ko imirwano igiye guhagarara vuba.