Iran yangije ibigo 20 by’Amerika
Amashusho ya satellites yashyizwe hanze na BBC Verify yemeza ko Iran yagabye ibitero bikangiza ibigo 20 by’abasirikare ba Amerika guhera mu mpera z’ukwezi kwa Gashyantare 2026.
Ibi bitero byagaragaye ko byagize ingaruka zikomeye kurusha izo ibiro bya Pentagon byari byemera ku mugaragaro.
Mu bihugu byibasiwe harimo Arabia Sauditte, Leta Zunze Ubumwe z’Abarabu (UAE), Qatar, Kuwait, Iraq, Jordan, Bahrain na Oman.Mu byangiritse harimo indege z’ubutasi, ibikoresho byo kurinda ibisasu bya misile ndetse n’ibigo by’itumanaho bya gisirikare.
Harimo intwaro zigezweho zo mu bwoko bwa THAAD (Terminal High Altitude Area Defense) zifite agaciro ka miliyari 1 y’amadolari ($1B) kuri buri imwe, zikaba zari ku birindiro bya Al Ruwais na Al Sader mu bihugu bya UAE hamwe na Muwaffaq Salti muri Jordan.
Hangijwe indege y’ubutasi y’agaciro ya E-3 Sentry (ishobora kugura miliyoni $700) ku kigo cya Prince Sultan muri Saudi Arabia, ndetse n’ibiziga (satellite dish) by’itumanaho rya satellite byarangiritse cyane kuri Camp Arifjan muri Kuwait.
Raporo ya Pentagon yo mu kwezi kwa Gicurasi yerekana ko intambara yahitanye cyangwa ikangiza nibura indege 42 z’intambara nka F-15, F-35, n’indege zitagira abapilote (drones) 24 zo mu bwoko bwa MQ-9 Reaper.
Amerika ikomeje kuvuga ko yaciye intege ubushobozi bwa gisirikare bwa Iran, nyamara ibimenyetso bishya byerekana ko Tehran igifite ubushobozi bwo kugaba ibitero bifatika ku nyungu za Amerika muri aka karere.
Iran na yo yahise ivuga ko yihoreye yibasira ikigo cya gisirikare cya Amerika kiri muri aka karere, mu gihe Kuwait yatangaje ko ingabo zayo ziri guhangana n’ibitero bya misile na drones byaturutse hanze y’igihugu.
Nubwo impande zombi zikomeje ibiganiro byo gushaka amasezerano yo guhagarika intambara burundu, ibikorwa bya gisirikare bikomeje gutera impungenge ko amahoro ashobora kongera gusubira inyuma
