Irani iri mu myigaragambyo ikaze: ibitaro byuzuye inkomere n’imirambo
Imyigaragambyo ikomeye ikomeje kwiyongera muri Irani, aho abaganga n’abakozi bo mu bitaro batangaza ko byarengewe n’umubare munini w’abapfuye n’abakomeretse, benshi muri bo bakaba ari urubyiruko rwarashwe hakoreshejwe amasasu.
Imyigaragambyo yatangiye i Tehran kubera ibibazo by’ubukungu, ikwira mu mijyi irenga 100, ikaba imaze guhitana abantu babarirwa mu magana.
Leta Zunze Ubumwe z’Amerika zashinje Irani gukoresha ingufu ku baturage, mu gihe Tehran ishinja Amerika n’abandi banyamahanga guteza imvururu. Interineti yarafunzwe mu gihugu hose, bituma bigorana kugenzura amakuru.
Abayobozi ba Irani bashimangira ko batazorohera abatavuga rumwe na bo, mu gihe bamwe mu batavuga rumwe n’ubutegetsi basaba abaturage gukomeza imyigaragambyo. Abasesenguzi bemeza ko hakiri kare kuvuga ihinduka ry’ubutegetsi, nubwo igitutu gikomeje kwiyongera.
Taghi Rahmani, umunyapolitiki wo muri Irani wamaze imyaka 14 afunzwe, avuga ko impinduka zifatika zigomba guturuka mu Banya-Irani ubwa bo, hatabayeho kwivanga kw’abanyamahanga. Umugore we, Narges Mohammadi, wegukanye igihembo cy’amahoro cyitiriwe Nobel, yongeye gufungwa mu Kuboza umwaka ushize.
Iyi myigaragambyo ni yo ya mbere ikomeye kuva mu mvururu zo mu 2022, zatangijwe n’urupfu rwa Mahsa Amini wapfiriye muri kasho ya polisi, nyuma yo gufatwa n’urwego rushinzwe imyitwarire rumushinja kutambara neza hijab, umwambaro w’abagore b’Abayisilamu. Icyo gihe, nk’uko bivugwa n’imiryango iharanira uburenganzira bwa muntu, abantu barenga 550 barishwe, naho abarenga 20,000 barafungwa.
