Kayonza: Bari gusuhuka ku bwinshi kubera inzara

Abaturage bo mu Murenge wa Ndego w’Akarere ka Kayonza bavuga ko bari gusuhuka ku bwinshi kubera ikibazo cy’inzara kibugarije nk’uko TV1 ibitangaza.

Aba baturage bavuga ko inzara iterwa n’izuba ryinshi ryatumye habaho amapfa ndetse ko no kubona icyo kurya ari ingorabahizi.

Umwe muri abo baturage yagize ati: “Inzara itumereye nabi cyane ku buryo budasubirwaho. Natwe twabuze uko tubigenza. Ubu urabona kuva mugitondo sindarya, turya nimugoroba gusa. Nta muntu wa Ndego urya kabiri.”

Undi na we yagize ati: “Inzara iravuza ubuhuha kuko duhanganye n’izuba imyaka itatu yose. Twari twahinze ariko izuba ryishe ibishyimbo, nta n’uwariye umushogoro.”

Bakomeza bavuga ko uretse n’imyaka yumye, n’abantu ubwa bo bumye.

Iyi nzara, abaturage bavuga ko yafashe indi ntera ku buryo umugore witwa Kakuze Claudine yafashe icyemezo cyo kwiyahura nyuma yo guteka imitanga yabuze icyo ateka mu rwego rwo kujijisha abana nk’uko abivuga, gusa aza gutabarwa atarashiramo umwuka.

Yagize ati: “Ndaza nshaka ikintu ntekera abana ndakibura. Mbonye ko binyobeye abana bambaza ngo ndabaha iki, mbura icyo mbaha, njya guca imitanga ndayiteka, mpita ngenda nywa ikinini cy’imbeba, ndangije sinzi uko byagenze gusa nituye hasi”.

Akomeza agira ati: “Nakangutse mbona abantu bampagaze hejuru, bambwira ngo nari niyahuye”.

Uretse ibyo kandi, abaturage bamaze iminsi basuhuka cyane cyane abo mu Mudugudu wa Nyamata wo mu Kagari ka Byimana kuko ingo 18 zifunze nyuma y’uko bene zo basuhutse ndetse n’abasigaye bavuga ko mu minsi iri imbere bashobora gusuhuka.

Uyu yagize ati: “Barashize nta bantu bakiba aha hose. Bose baragiye. Ubu nubwo ubona natwe duhari ariko duhari tudahari”.

Aba baturage bavuga ko nyuma y’uko ubuyobozi bubonye ko abaturage bagiye gushira muri uwo murenge, iyo babonye abasuhutse, babatangira bakabasubiza mu ngo za bo.

Umuyobozi w’Umudugudu wa Nyamata, Gumiriza samuel yungamo avuga ko bibagora kuyobora abaturage bashonje. Ati: “Biragora kuyobora abaturage bashonje. Nta n’ikintu wababwira ngo bumve. Nk’uko babivuze, barimo barasuhuka. Ubu mu mudugudu tumaze kubarura ingo 20 zakinze zirasuhuka”.

Abaturage bo muri aka gace bavuga ko bagiye bizwezwa kenshi ko bazahabwa uburyo bwo kuhira ngo bahangane n’amapfa, ariko amaso yaheze mu kirere. Gusa bizera ko nibabona uko bafashwa kuhira, bizatanga umusaruro.

Ntibyakunze kuvugana n’ubuyobozi bw’Akarere ka Kayonza ngo bugire icyo buvuga kuri iki kibazo n’icyo buteganyiriza aba baturage.

Uretse uyu Murenge wa Ndego, ahandi hugarijwe n’iki kibazo ni mu mirenge ya Kabare, Rwinkwavu, Mwiri na Murama n’utundi duce tuhegereye. Gusa hari hasanzwe umushinga ufatanya n’abaturage kurwanya amapfa akunda kwibasira ibi bice.