Lorenzo yasubije RIB yamuhaye gasopo
Lorenzo yasubije RIB yamuhaye gasopo Umunyamakuru wa siporo kuri radio SK FM Musangamfura Lorenzo Christian yasubije ubutumwa bwatanzwe n’Urwego rw’Igihugu rw’Ubugenzacyaha (RIB) bwari bwihanangirije abanyamakuru ba siporo bubasaba kubahiriza amahame y’itangazamakuru no kwirinda amagambo ashobora guteza umwiryane mu babakurikira.
Lorenzo yatangaje ibi nyuma y’amagambo yatangajwe n’Umuvugizi wa RIB, Dr. Murangira B. Thierry, waburiye abanyamakuru bakora ibiganiro bya siporo abasaba ko bagomba kurangwa n’ubunyamwuga, bakirinda gutukana, guhanganisha abakurikira cyangwa gutangaza ibihuha mu biganiro bakora.Dr Murangira yagarutse kuri ibi mu kiganiro yagiranye n’Itangazamakuru ku wa 10 Werurwe 2026 mu kiganiro yagiranye n’Itangazamakuru.
Mu gutanga ubu butumwa yakomoje ku banyamakuru barimo Lorenzo na Rugaju Reagan nkabaherutse gukozanyaho baterana amagambo ku mbuga nkoranyambaga.
Lorenzo nyuma yo kubona ibyatangajwe n’umuvugizi wa RIB yanyarukiye ku rubuga rwa X amusaba ko yareka kumuvuga mu bikorwa birimo abanyabyaha ndetse agaragaza ko ari kenshi arengana agatabaza akabura umutabara.
Mu butumwa bwe yanditse agira ati: “Bwana Murangira, ndasobanuza kandi niyanzuza. Murampa gasopo mumvuga muri Press Conference kuko nakoze iki?”
“Ese mutekereza ko kuvuga izina ry’umuntu muri Press Conference mwerekanyemo abanyabyaha, nta ngaruka bigira? Ndi umunyarwanda, mfite uburenganzira mpabwa n’itegeko.”
Yakomeje agaragaza ko yifuza ko habaho ibisobanuro byimbitse ku mpamvu yatumye izina rye rivugwa muri icyo kiganiro, anashimangira ko afite uburenganzira bwo gusaba ibisobanuro nk’umuturage w’u Rwanda.
Ibi bibaye mu gihe RIB yari imaze gutangaza ko itazihanganira imyitwarire y’abanyamakuru ishobora guteza amakimbirane mu bakurikira siporo, ikavuga ko uzongera kugaragaraho amakosa nk’ayo azajya akurikiranwa n’inzego zibishinzwe.
Ku wa 10 Werurwe 2026 Urwego rw’Igihugu rw’Ubugenzacyaha (RIB) rwerekanye abasore babiri bakekwaho gutekera abakobwa imitwe, bikarangira babambuye ibyo bafite byose ndetse bakanabasambanya.
Bafashwe nyuma y’uko mu bihe bitandukanye hagati ya Ukwakira n’Ugushyingo 2025, RIB mu Karere ka Rwamagana yagiye yakira ibirego ku byaha by’ubwambuzi bushukana, ubujura no gusambanya ku ngufu ariko itangiye iperereza isanga bihuriye ku gushukisha abantu akazi n’inzira byakorwagamo zigana i Rwamagana.
