Mamadou Sy na Dauda ba APR FC bakuwe mu bihano
Ku wa Kane tariki ya 30 Ukwakira 2025, abakinnyi b’ikipe ya APR FC bari barafatiwe ibihano n’ubuyobozi bw’iyi kipe, byakuweho ndetse basubizwa mu mwiherero hamwe n’abandi bakinnyi.
Ibi byagaragajwe mu itangazo APR FC yashyize hanze kuri uyu wa 31 Ukwakira 2025 nyuma y’uko komite ishinzwe imyitwarire muri iyi kipe iteranye kugira ngo ifate icyemezo kuri aba bakinnyi bari barahagaritswe mu gihe iperereza ryari rigikomeje.
Nyuma yo gusuzuma neza, komite yasanze aba bakinnyi bombi bararenze nkana ku mabwiriza y’ikipe yatanzwe n’abatoza, bava mu mwiherero nta burenganzira mbere y’umukino wa CAF Champions League wabereye i Cairo wahuje APR FC na Pyramids FC yo mu Misiri.
Iyo myitwarire idahwitse yateje urwikekwe ndetse ibangamira imyiteguro n’imikinire y’ikipe kuko abo bakinnyi bambi bari ku rutonde rw’abakinnyi 11 bagombaga kubanza mu kibuga.
Dauda na Mamadou Sy bemeye amakosa bakoze ndetse basaba imbabazi, kandi biyemeza gukurikiza amabwiriza y’ikipe.
Nyuma yo gusuzuma neza iki kibazo, komite ishinzwe imyitwarire, yahaye aba bakinnyi umuburo wa nyuma mu nyandiko hamwe n’izindi ngamba z’inyongera z’imyitwarire maze abakinnyi bahita basubira mu mwiherero.
Mu mikino nyafurika ihuza amakipe yabaye aya mbere muri shampiyona ya bo, CAF Champions League, APR FC yakinnye na Pyramids FC yo mu Misiri, aho mu mukino ubanza wabereye i Kigali kuri Pele Stadium, APR FC yatsinzwe 2-0, mu mukino wo kwishyura wabereye i Cairo, itsindwa 3-0, byose hamwe biba 5-0 bituma ihita isezererwa mu irushanwa.
Uyu munsi APR FC yerekeje mu Karere ka Rubavu, aho ku munsi w’ejo tariki ya 1 Ugushyingo 2025 izakina na Rutsiro FC umukino wa 6 wa shampiyona ya 2025-2026 kuri Sitade Umuganda.
