Minisitiri Nduhungirehe yagiranye ibiganiro na mugenzi we w’Algeria
Minisitiri w’Ububanyi n’Amahanga n’Ubutwererane w’u Rwanda, Amb.Olivier Jean Patrick Nduhungirehe, yagiranye ibiganiro byihariye na Minisitiri Ushinzwe Ububanyi n’Amahanga n’Abanya-Algeria baba mu mahanga w’Algeria, Ahmed Attaf, kuri uyu wa Mbere tariki ya 1 Ukuboza 2025.
Ibi biganiro bagiranye byibanze ku gukomeza gushimangira imikoranire hagati y’u Rwanda n’Algeria.
Minisitiri Nduhungirehe ari i Alger aho yitabiriye Inama Mpuzamahanga ku byaha by’Ubukoloni muri Afurika, ishingiye ku nsanganyamatsiko igira iti: “Binyuze mu kwerekana akarengane k’amateka, hagaragazwa ibyaha by’ubukoloni”.
Muri iyi nama y’iminsi ibiri, kuva ku wa 30 Ugushyingo kugeza ku wa 1 Ukuboza 2025, Minisitiri Nduhungirehe yagize uruhare mu kiganiro cy’itsinda ry’abayobozi, ku nsanganyamatsiko igira iti: “Kuva mu kwemeza tujya mu gushyiraho amategeko: Gushyira ibyaha by’ubukoloni mu mategeko ahana ibyaha mpuzamahanga.”
Mu butumwa yatanze, yagaragaje akamaro ko gukomeza umuhate nk’Afurika mu guhangana n’ingaruka z’ubukoloni zigikomeje kugaragara mu buryo butandukanye.
Iyi nama yateguwe hashingiwe ku cyemezo cy’Umuryango w’Afurika Yunze Ubumwe (AU) cyo mu kwezi kwa Gashyantare 2025.
U Rwanda n’Algeria basanzwe bafitanye amasezerano menshi y’ubufatanye mu nzego zitandukanye: ubwikorezi bw’indege, itumanaho, ubucuruzi n’ishoramari, ubuhinzi, uburezi, ubuvuzi, ikoreshwa ry’ikoranabuhanga no guhanga udushya, ubutabera, amahugurwa y’abakozi, umutekano, n’ubufatanye mu by’ubugenzacyaha.
Minisitiri Nduhungirehe yagiranye ibiganiro byihariye na mugenzi we w’Algeria, Ahmed Attaf
