Minisitiri w’Ingabo w’Amerika yasabye Umugaba Mukuru w’Ingabo kwegura
Minisitiri w’Ingabo wa Leta Zunze Ubumwe z’Amerika, Pete Hegseth, yasabye Umugaba Mukuru w’Ingabo, Jenerali Randy George, kuva ku mwanya ariho, nk’uko byatangajwe n’itangazamakuru rya CBS News rikorana na BBC muri Amerika.
Sean Parnell, umuvugizi mukuru wa Pentagon, yatangaje abinyujije ku mbuga nkoranyambaga ko Gen George “agiye guhita ava ku mwanya w’Umugaba Mukuru w’Ingabo ako kanya”.
Mu bisanzwe, uyu mwanya umara igihe cy’imyaka ine. Gen George, wabaye umusirikare w’umwuga kandi wize muri West Point Military Academy, yari yarawushyizweho mu 2023 n’uwari Perezida w’Amerika icyo gihe, Joe Biden.
Iyi mpinduka ibaye mu gihe Perezida Donald Trump aherutse gutangaza mu ijambo rye ko intambara ihuza Amerika, Israel na Iran ishobora kurangira mu gihe cya vuba.
Gen George yagiye mu bikorwa bya gisirikare bikomeye birimo intambara ya mbere yo mu Kigobe cy’Abarabu, ndetse n’intambara ziheruka kuba muri Iraq na Afghanistan. Icyakora, impamvu nyamukuru y’icyemezo cyo kumusaba kwegura ntiratangazwa ku mugaragaro.
