Mu Rwanda Abayisilamu Bakusanyije Miliyoni 38 Frw Zogufasha Abatishoboye

Umuryango w’Abayisilamu mu Rwanda, RMC, watangaje ko mu kwezi gutagatifu kw’igisibo cya ‘Ramadhan’, wakusanyije Miliyoni 38 Frw zafashijwe abatishoboye.

Mu gitondo cyo kuri uyu wa Gatanu tariki 20 Werurwe 2026 Abayisilamu bo hirya no hino mu Rwanda, bifatanyije n’abo ku Isi yose, mu isengesho risoza ukwezi Gutagatifu kwa Ramadhan.

Ni isengesho bizihirizaho umunsi mukuru wa usanzwe uzwi ku izina rya Eid al-Fitr,aho ku rwego rw’Igihugu iri sengesho ryabereye kuri Kigali Pelé Stadium riyoborwa na Mufti w’u Rwanda, Sheikh Sindayigaya Moussa, ryitabirwa n’abarenga ibihumbi 27.

Ni isengesho ryahuje imbaga y’abemera b’idini ya Islam bo mu ngeri zose ndetse ryanitabiriwe n’umugaba mukuru w’ingabo z’u Rwanda General Mubarak Muganga ndetse n’umuvunyi wungirije Mukama Abbas nabo bagaragaye bifatanyije n’abandi mu isengesho.

Umuryango w’Abayisilamu mu Rwanda, watangaje ko mu kwezi kwa Ramadhan, hakusanyijwe arenga Miliyoni 38 Frw yakoreshejwe mu kugurira abatishoboye ibiribwa birimo toni 20 z’umuceri.

Uretse mu Mujyi wa Kigali, Abayisilamu b’Abanyamahanga biganjemo abaturutse muri Repubulika ya Demokarasi ya Congo (RDC), bahuriye muri Stade Umuganda mu Karere ka Rubavu, bifatanya na bagenzi babo bo mu Rwanda.

Mu kwizihiza uyu munsi Mukuru wa Eid Al-Fitr.Imam w’Umuryango w’Abayisilamu mu Ntara y’i Burengerazuba, Sheikh Iyakaremye Ahmad, yabasabye kunga Ubumwe.

Mu butumwa yageneye Abayisiramu bo mu Rwanda, Mufti w’u Rwanda, Sheikh Sindayigaya Mussa, yibukije Abayislamu ko gusoza Igisibo cya Ramadhan bidasobanuye iherezo ryo gukora ibikorwa byiza ahubwo ko na nyuma yacyo bakwiye kubikomeza.

Ati “Ukwezi kwa Ramadhani kuba tugusoje ntabwo bivuze ko duhagaritse gukora ibikorwa byiza ahubwo umunyabwenge ni uvana amasomo muri uku kwezi yo kongera umuvuduko agakomerezaho kubera ko Imana iravuga iti’uzagaragire Nyagasani wawe, uzakore ibikorwa byiza ibihe byose kugeza ubwo urupfu ruzakugeraho”.

Mufti w’u Rwanda, Sheikh Sindayigaya Moussa, yabasabye gusigasira Umutekano kuko ari inkingi y’Ubuzima.

Ati “Ingabire y’Umutekano ni ikintu gikomeye. Ni yo mpamvu Intumwa y’Imana, Ibrahim, yabanje gusaba Imana ayibwira ati ‘Iki gihugu cya Maka, gihundagazeho Amahoro n’umutekano, maze abagituye, ubahe amafunguro, ubukire no gutera imbere”.

Igisibo cy’ukwezi kwa Ramadhan, gikorwamo ibikorwa byinshi birimo kwiyegereza Imana, biyiriza ubusa ndetse bakarushaho gusangira n’abatishoboye.