Muhanga: Bane mu bakekwaho gutera abaturage bitwaje intwaro gakondo bafashwe
Polisi y’u Rwanda ikorera mu Karere ka Muhanga yatangaje ko yamaze guta muri yombi abantu bane (4) bakekwaho gutera abaturage bitwaje intwaro gakondo ku manywa y’ihangu.
Aba bantu bibumbiye mu itsinda ry’abiyise “abahebyi” cyangwa “Wrong Turn” bagamije guhungabanya umutekano w’abacuzi b’amabuye y’agaciro mu turere twa Ruhango na Muhanga kugira ngo babirukane bayasahure, banayacukure mu buryo bunyuranyije n’amategeko.
Ku wa Mbere tariki ya 01 Ukuboza 2025 ni bwo aba bahebyi bagiye ku kirombe giherereye mu Murenge wa Kabacuzi w’Akarere ka Muhanga batera abakozi ba kompanyi icukura amabuye y’agaciro muri icyo kirombe irabamenesha.
Umwe mu bakozi b’iyi kompanyi yavuze ko ubwo aba bahebyi babateraga basanze bari mu nama bariruka barabahunga. Yagize ati: “Abayobozi bazindutse badukoresha inama, tubona aba-Wrong Turn baraje, baratangatanga bari abantu nka 200 cyangwa 250. Ariko rwose baratuzengereje”.
Ubwo abo bahebyi bateraga iyo kompanyi, bari bitwaje ibikoresho birimo imihoro, amashoka, amapiki, amahiri n’ibindi.
Ntabwo aba bagizi ba nabi babangamiye abacukuzi gusa, ahubwo n’abaturage bari mu mirimo ya bo isanzwe barabahunze gusa Polisi yahise itabara abari bagabye igitero bariruka.
Nubwo aba bacukuzi bavuga ko batewe n’abantu barenga 100, umuvugizi wa Polisi mu Ntara y’Amajyepfo, CIP Hassan Kamanzi, yabwiye TV1 ko abateye abakorana n’iyo kompanyi y’ubucukuzi bw’amabuye y’agaciro ari abantu bari hagati ya 20 na 30 ndetse bamwe muri bo bakaba bamaze gutabwa muri yombi.
Yagize ati: “Abacukuraga ni abakozi ba kompanyi ariko ababateye ni bamwe mu bahoze ari abakozi b’iyo kompanyi basezerewe kubera imyitwarire ya bo mibi. Urumva rero bari bahazi, baza bayoboye izindi nsoresore zari hagati ya 20 na 30 ariko nta na rimwe Polisi izabyihanganira. Bane muri bo bamaze gufatwa kandi n’abandi bari bufatwe”.
Uretse aba bahebyi bateye kompanyi yo mu Murenge wa Kabacuzi, muri Muhanga, baheruka no gutera kompanyi icukura amabuye y’agaciro mu Murenge wa Mwendo w’Akarere ka Ruhango.
