“Ndamwubaha cyane” — Muhoozi ashimangira umubano we na Tshisekedi

Jenerali Muhoozi Kainerugaba, Umugaba Mukuru w’Ingabo za Uganda, yatangaje amagambo agaragaza icyubahiro afitiye Perezida wa Repubulika Iharanira Demokarasi ya Congo, Félix Tshisekedi.

Mu butumwa yashyize ku rubuga rwa X (rwahoze ari Twitter), Muhoozi yabwiye Abanye-Congo bose, bagera kuri miliyoni 100, ko afata Tshisekedi nka mukuru we kandi amuha icyubahiro gikomeye.

Yagize ati: “Reka mbamenyeshe bavandimwe bacu bagera kuri miliyoni 100 muri DRC, ko igihe cyose mbonye Perezida Tshisekedi, ndahaguruka nkamuterera isari. Ni mukuru wanjye”.

Aya magambo ya Muhoozi agaragaza umubano mwiza n’icyizere afitiye umukuru w’igihugu cya Congo, mu gihe ibihugu byo mu karere bikomeje gushaka uko byakomeza kunoza umutekano n’ubufatanye.

Nubwo ari ubutumwa bworoshye, bufite igisobanuro gikomeye mu rwego rwa dipolomasi, kuko bushimangira umubano wihariye hagati y’abayobozi b’ibihugu byombi.

Mu gihe hakomeje ibiganiro n’imikoranire hagati y’ibihugu byo mu karere k’Afurika y’Iburasirazuba, amagambo nk’aya ashobora kugira uruhare mu kongera icyizere no guteza imbere ubufatanye hagati y’abayobozi.