Nyarugenge: Agahinda k’umugore watwawe umugabo na nyina

Isimbi Cécile Gloria, utuye mu Mudugudu wa Kiberinka, Akagari ka Rugarama, Umurenge wa Nyamirambo mu Karere ka Nyarugenge, afite agahinda gakomeye ko kuba nyina yaramutwaye umugabo nyuma yo kwimukira mu rugo rwe avuye aho yari asanzwe atuye nk’uko TV1 ibitangaza.

Isimbi avuga ko urushako rwe rutamuhiriye, kandi ko ibibazo byatangiye mu ntangiriro za 2020 ubwo nyina yimukaga aho yabaga akaza gutura mu rugo rwe, bikaviramo uyu mugore gutakaza umwanya yari afite nk’umufasha w’umugabo we. Yemeza ko kuva uwo mubyeyi yahagera, yatangiye gufatwa nk’umwana mu rugo rwe.

Yagize ati: “Mama wanjye yaje kuba iwanjye maze imyaka itanu nshyingiwe. Aho ahagereye rero, mu myaka itatu n’amezi umunani yahabaye ni bwo haje impinduka mu mibanire yanjye n’umugabo wanjye. Nk’umugore mu rugo, hari ukuntu twajyaga twumvikana n’umugabo wanjye imikoreshereze y’amafaranga ahembwa, tukajya inama y’ibyo duhaha. Uko kujya inama rero no gushyira hamwe byararangiye. Ibyo twakoranaga byose atangira kubireka, harimo gutanga amafunguro no kuba twajyana ahantu, ahubwo akabikorana na mama wanjye”.

Isimbi avuga ko yasabye umugabo we inshuro nyinshi ko bicara bakaganiriza nyina mu kinyabupfura, bakamwumvisha ko inzu ari nto kubera urubyaro kandi ko ashobora kwimukira ahandi ariko bagakomeza kubana neza. Gusa ngo yabimusabye imyaka ibiri yose, umugabo ntiyabishyira mu bikorwa.

Yongeraho ati: “Nashatse umugabo undusha imyaka 20, kandi ari mu kigero cya mama. Birashoboka ko ari byo byatumye mama yishyiramo ko ari we mugore wo mu rugo, yibagirwa isano bari bafitanye”.

Ubwo ibibazo byari bikomeje gukura, Isimbi yabibwiye umuvandimwe wa nyina, amusaba kumumuganiriza. Nyina yemeye kwimuka, ariko ngo n’ubwo yagiye, Isimbi ntiyongeye kubona agaciro nk’umugore mu rugo rwe. Yaje gufata umwanzuro wo kuva mu rugo, yizeye ko umugabo azamukurikira ngo amucyure banaganire ku kibazo cya bo. Ariko ngo umugabo yatereye agati mu ryinyo, ahubwo nyina yinjira mu rugo ashingiye ku mpamvu y’uko umukobwa we “yataye urugo” akaza kwita ku bana yasize bakaba n’abuzukuru be.

Isimbi agira ati: “Bintera ipfunwe cyane. Aho nyuze hose numva bavuga ngo: ‘Dore wa mugore nyina yatwaye umugabo’. Umugabo wanjye na we bati: ‘Dore wa mugabo wacyuye nyirabukwe’. Mama na we bamubona bati: ‘Dore wa mukecuru watwaye umugabo w’e umugabo w’umukobwa we’. Birambabaza cyane.”

Umugabo we, bashyingiranywe mu mategeko, yahakanye ibyo ashinjwa byose, agira ati: “Uriya ni umugore wanjye. Ibyo avuga si ukuri. Ndi umugabo w’imyaka 53, ntabwo nashatse ngo nikinire mu rugo, nashatse ngo nubake.”

Nyina w’uyu mugore na we yahakanye ibyo ashinjwa, ati: “Umwana wanjye arambeshyera. Ese ubu nabura umugabo muri uru Rwanda aho kujya ku mukwe wanjye? Nta mafaranga, nta n’ubwiza agira. Gute se najya ku mukwe wanjye? Sinigeze nsambana kandi n’undi wundi nasambana na we. Nemera Imana yo mu ijuru.”

Bamwe mu baturanyi bavuga ko urugo rwa Isimbi n’umugabo rwafatwaga nk’intangarugero, ariko ko byabababaje kubona umugore asohoka mu rugo nyina akarwinjiramo. Umuturanyi umwe yagize ati: “Nabimenyeye mu nteko y’abaturage. Abaturage numva bavuga ko hari umudamu usenyewe na nyina, kuko umugabo aho kwita ku mugore we yita kuri nyina. Ibintu byabaye muri uru rugo sinzi aho byaturutse, ni agahomamunwa ni ubwa mbere mbyumvise”.

Uyu mugore ushinja umugabo we gucyura nyina kandi na we agashinjwa guta urugo, ikibazo cya bo cyagejejwe mu nkiko. Urubanza rwa bo ruzaburanishwa mu 2027. Gusa mbere y’itariki yo kuburana, umugabo yatanze ikirego asaba gatanya, urukiko ruyemera rutegeka ko umugore ava mu rugo.

Urukiko rwanzuye ko buri kwezi umugabo agomba guha umugore 170,000 Frw, abana babiri bafitanye (ufite imyaka 9 n’ufite imyaka 5) bakagumana na se, ariko ababyeyi bombi bakagumana inshingano zo kubarera.